الماتى وبلىسىندا ءسابيى شەتىنەپ كەتكەن اكە دارىگەرلەردى جاعادان الىپ، جانجال شىعاردى،- دەپ حابارلايدى Qamshy.kz كتك ارناسىنا سىلتەمە جاساپ.
ونىڭ ايتۋىنشا، ايەلى اق حالاتتىلاردىڭ كەسىرىنەن ايىنان ەرتە بوسانىپ قويعان. 7 ايلىق بوپ ومىرگە كەلگەن شاقالاقتىڭ باستاپقىدا دەنساۋلىعى دا جاقسى بولعانىمەن، ارادا جەتى كۇن وتپەي شەتىنەپ كەتىپتى. ءسابيى ءولىپ قايعىرعان جالعىز بۇل وتباسى ەمەس ەكەن. قاسكەلەڭ اۋرۋحاناسىندا ولگەن باسقا دا بالالاردىڭ اكەلەرى وقيعانىڭ قايتالانعانىن ەستىپ، بۇگىن ايقايعا باستى.
كۇنى كەشە عانا اكە اتانعان فارحات ءسابيىن ءالى يىسكەپ تە ۇلگەرمەپتى. ايتۋىنشا، اياعى اۋىر كەلىنشەگى دارىگەرلەردىڭ بەرگەن دارىسىنەن سوڭ اۋرۋحاناعا تۇسكەن. جاعدايى اۋىرلاعان ايەلدى اق حالاتتىلار بىردەن بوساندىرىپ الىپتى.
"اكۋشەر ريفات كەلىنشەگىمنىڭ دە، بالانىڭ دا جاعدايى ءتاۋىر دەگەن. 20 مىڭ تەڭگە اقشا سۇرادى بەردى"، - دەيدى اشىنعان اكە فارحات تۇرىمبەتوۆ.
ءبىراق جاعدايى جاقسى دەلىنگەن جەتى ايلىق بالا جەتى كۇن وتپەي شەتىنەپتى. ال اق حالاتتىلار قارالى حاباردى جەتكىزگەننەن باسقا ماردىمدى جاۋاپ بەرە الماعان. ولار بالا، امان-ساۋ، تاماق ءىشىپ جاتىر دەگەن.
اۋرۋحانا باسشىلىعى وزدەرىنە شاڭ جۋىتپاق وتىر. كەرىسىنشە،ءسابيىنىڭ ءولىمىنىڭ سەبەبىن بىلگىسى كەلگەن اكەنى تىڭداعىلارى دا كەلمەي، كۇزەت شاقىرتىپ، ناۋقاستاردىڭ ىزاسىن تۋدىردى.
سويتسە، بۇل پەرزەنتحانادان جىلاپ شىققان جالعىز بۇل وتباسى ەمەس ەكەن. ەرقۋان ەگىزبايەۆ تا وسى جەردەن بالاسىز كەتكەن. ونىڭ ءسابيىن اق حالاتتىلار شاتاستىرىپ تۋبەركۋلەزدەن ەمدەگەن ەكەن. كەيىن سوت ساراپتاماسى بالانىڭ ءتىپتى ساۋ بولعانىن ايتىپتى.
"تۋبەركۋلەز دەدى، تەكسەرتسەك تۋبەركۋلەز ەمەس، باۋىرى ەزىلىپ كەتكەن دارىدەن، اۋىر دارىلەردەن. جازاسىن بەرۋ كەرەك، دارىگەرلەردىڭ. ءبارىن تەكسەرتۋ كەرەك"، - دەيدى قاسكەلەن كەنتىنىڭ تۇرعىنى ەرقۋان ەگىزبايەۆ.
ال جەتى ايلىق بالاسىنان ايىرىلىپ قالعان انا ەندى بۇل پەرزەنتحاناعا جولامايتىنىن ايتىپ، جىلاپ وتىر.
تۇڭعىشىن بەسىككە ەمەس، قارا جەر قويناۋىنا تاپسىرۋعا ءماجبۇر اكە ەندى سوتقا جۇگىنىپ، دەنساۋلىق مينيسترىنە دە شاعىمدانباقشى.
