حراپۋنوۆتىڭ ەل قازىناسىنان جىمقىرعان ميلليوندارىن جاسىرۋعا دونالد ترامپ كومەكتەسكەن،- دەپ حابارلايدى Qamshy.kz كتك ارناسىنا سىلتەمە جاساپ. بريتاندىق تانىمال اقپارات قۇرالدارى اقش پرەزيدەنتتىگىنەن ۇمىتكەر ترامپ پەن قازاقستاندىق الاياق  حراپۋنوۆتىڭ بايلانىسى بولعان دەپ جارىسا جازۋدا.

جۋرناليستىك زەرتتەۋ جۇرگىزگەن بريتاندىق باسىلىم الماتىنىڭ ەكس-اكىمى مەن ترامپتىڭ بىر-بىرىمەن حات الىسقانىن انىقتاپ، ەكەۋىنە ورتاق بانكتىك قۇجاتتاردى تاپتى. جانە حراپۋنوۆتىڭ قىزى ەلۆيرا كۋدرياشوۆا  ميلليونداعان دوللارعا مانحەتتەندەگى ترامپتىڭ اسپانمەن تالاسقان  "ترامپ تاۋەرس" ۇيىنەن پاتەر العان.

ءبىراق، 70 جاستاعى امەريكالىق بيزنەسمەن حراپۋنوۆتار جانۇياسىنا مۇلكىن تىكەلەي ساتپاپتى. كەلىسىم-شارتپەن ميلليونەردىڭ قاراماعىنداعى كومپانيالاردىڭ ءبىرى اينالىسقان. ءدال وسى فيرما ۆيكتور حراپۋنوۆتىڭ ۇلى يلياس حراپۋنوۆقا تيەسىلى قوناق ءۇيدى قايتا جوسپارلاۋعا دا قاتىسىپتى. بۇل قيتۇرقىلىقتار دالەلدەنسە، امەريكا پرەزيدەنتى بولۋدان ءۇمىتى بار دونالد ترامپقا دا ، رەسپۋبليكاشىلدار پارتياسىنىڭ بەدەلىنە ۇلكەن نۇقسان كەلتىرەتىنى انىق. ال الماتىنى باسقارعان جىلدارى گەكتارلاپ جەر تەلىمدەرى مەن اكىمشىلىك عيماراتتارىن ساتىپ بايىعان ۆيكتور حراپۋنوۆ بالا-شاعاسىمەن شۆەيساريادا شالقىپ ءومىر ءسۇرىپ جاتىر. قازاقستاندا وعان قاتىستى 20 قىلمىستىق ءىس قوزعالعان. ايەلى لەيلا مەن حراپۋنوۆتىڭ وزىنە ينتەرپول ىزدەۋ جاريالاسا دا، ەرلى-زايىپتىلار ۇستالار ەمەس.