بۇگىن، «جاس الاش» پەن «تريبۋنا» گازەتتەرى بىرلەسىپ، الماتىداعى «استانا» قوناق ۇيىندە، «ءۇشتۇعىرلى ءتىل ساياساتى» مەن باسقا دا قوعامدىق پروبلەمالارعا قاتىستى قوعامدىق جيىن وتكىزدى. «جاس الاش» گازەتىنىڭ باس رەداكتورى رىسبەك سارسەنباي مەن «تريبۋنا» گازەتىنىڭ باس رەداكتورى جانبولات ماماي تاراپىنان وتكىزىلگەن جيىنعا زيالى قاۋىم وكىلدەرى،  اقىن-جازۋشىلار مەن ءبىر توپ ۇلت جاناشىرلارى قاتىستى. ولاردىڭ اراسىندا ساياساتكەر اقساقال سەرىكبولسىن ءابدىلدين، جازۋشى قابدەش ءجۇمادىلوۆ، مەكەمتاس مىرزاحمەتوۆ، اقىن مۇحتار شاحانوۆ، تەمىرحان مەدەتبەكوۆ، ساياساتكەر دوس كوشىم جانە قاناعات جۇكەشوۆ، مىرزان كەنجەباي سياقتى ازاماتتار بار.

جيىنعا سونداي-اق ءبىلىم جانە عىلىم ءمينيسترى ەرلان كەنجەعالي ۇلى ساعادييەۆ ارناۋلى شاقىرىلعان. الايدا، ول، جيىنعا كەلمەدى. جيىنعا كەلمەۋ سەبەبىن ءبىر كۇن قالعاندا، مينيسترلىكتىڭ باسپا ءسوز حاتشسى، سارسەنباي ۇلى مەن مامايدىڭ اتىنا ارناۋلى حات جازىپ، قىزمەتتىك قاربالستىعىمەن ءتۇسىندىردى. ءبىراق، جيىننىڭ ءوتۋىن قولدايتىنىن جەتكىزگەن.

قوعامدىق تىڭداۋعا كەلگەندەر «ءۇشتۇعىرلى ءتىل» ساياساتىنا ءبىر اۋىزدان قارسىلىعىن ءبىلدىرىپ، ءوز كوزقاراستارىمەن ءبولىستى. جيىن بارىسىندا ءتىل ماسەلەسى عانا كوتەرىلگەن جوق. جەر ماسەلەسى بويىنشا سوتقا تارتىلىپ جاتقان بەلسەندىلەر ماكس بوقايەۆ پەن تالعات اياننىڭ ماسەلەسى دە كوتەرىلدى. ولاردىڭ قامۋدا وتىرۋى جەر ماسەلەسىنىڭ تۇبەگەيلى شەشىم تاپپاعانىنىڭ ناتيجەسى ەكەنى ايتىلدى. ءسوز العان جانبولات ماماي، «ولار جۋىق ارادا اقتالىپ شىقپاسا، 16 جەلتوقسانعا قاراي «حالىق قاھارمانى» دەپ اتايىق، حالىق اتىنان ماراپاتتايىق!» دەدى. بۇل پىكىر دە ءبىر اۋىزدان قولداۋعا يە بولدى.

جيىنعا قاتىسۋشىلار وتىرىس سوڭىندا ارناۋلى قارار قابىلدادى. قارار ءماتىنىن جاقىن ۋاقىتتا «قامشى» پورتالىنان وقي الاتىن بولاسىزدار!