جۋىردا حالىقتىق كوممۋنيستەردەن سايلانعان ايقىن قوڭىروۆ باستاعان دەپۋتاتتار جاي جاتپاي ۇلتتىق بانكتىڭ ءتوراعاسى دانيار اقىشيەۆكە ساۋال جولداپ، ۇكىمەتتىڭ 2015 جىلدىڭ ءساۋىر ايىندا حالىقتىڭ يپوتەكالىق قارىزدارىن قايتا ەسەپتەۋ ءۇشىن ارنايى باعدارلامامەن بولگەن 130 ملرد. تەڭگەسىنىڭ تاعدىرى نە بولعانىن سۇرادى.
وسى 130 ملرد. تەڭگەمەن 2004 جىلدىڭ 1 قاڭتارىنان 2009 جىلدىڭ 31 جەلتوقسانىنا دەيىن يپوتەكالىق بورىش العانداردىڭ قارىزى قايتا ەسەپتەلىنەدى ەكەن. كوممۋنيستەر نەگە وسى قىسقا مەرزىم عانا قامتىلعانىن سۇرايدى. بورىشكەرلەردىڭ قابىرعاسى سوگىلىپ، تەڭگەنىڭ ناعىز قۇنسىزدانعان شاعى 2014 جىلدىڭ اقپانى ەدى عوي، وسى كەزەڭدەگى بورىشكەرلەردىڭ قارىزى نەگە قامتىلماعان، دەيدى دەپۋتاتتار. سونىمەن قاتار ولار باعدارلامانى ورىندايتىن بانكتەردىڭ قايسى 130 ملرد-تىڭ قانشاسىن العانىن بىلگىسى كەلىپتى جانە ولاردىڭ ءتىزىمىن بەرۋدى تالاپ ەتكەن. بۇل ارينە، «بارماق باستى، كوز قىستىمەن» تەك الپاۋىتتاردىڭ بانكتەرى عانا اساپ قالدى ما دەگەندى بىلگىلەرى كەلگەنى عوي...
دەپۋتاتتار ساۋالىنىڭ ەڭ سالماقتى جەرى مىناداي: باعدارلامامەن كەلگەن قاراجاتتى ماقساتسىز شىعىندارعا قاي بانك جۇمساپ جىبەرگەنىن كورسەتىڭىز. ولارعا قانداي شارالار قولدانىلدى؟ سونىمەن قاتار باعدارلاما بۇگىنگە دەيىن قانشا بورىشكەردى قامتىدى؟ بورىشكەرلەر تاراپىنان باعدارلاماعا قاتىسقان ەكىنشى دەڭگەيدەگى بانكتەردىڭ قانشاسىنىڭ ۇستىنەن قانشا ارىز-شاعىمدار ءتۇستى؟
بۇل ساۋالدارعا جاۋاپ بەرۋ قيىن ەمەس، ءبىراق كوكەلەرى مەن جاكەلەرىنىڭ بانكتەرىن «ءبۇلدىرىپ جاتىر» دەپ كورسەتۋگە اقىشيەۆتىڭ ايبىنى جەتەر مە ەكەن؟
ە.سەرىكبايەۆ، ساراپشى
