اقتوبە وبلىسىنىڭ قارعالى اۋدانىندا فيزيكا ءپانىنىڭ مۇعالىمىمەن سوزگە كەلىپ قالعان 11-سىنىپ وقۋشىلارى ونى وڭدىرماي ساباپ كەتكەن، دەپ حابارلايدى Qamshy.kz Baq.kz سايتىنا سىلتەمە جاساپ.

جاس مۇعالىممەن جاعا جىرتىسقان تۇلەكتەردىڭ ۇلگەرىمى جاقسى، جامان قىلىقتارىمەن بۇعان دەيىن كوزگە ءتۇسىپ كورمەگەن، دەيدى ارىنوۆ اتىنداعى ورتا مەكتەپ قىزمەتكەرلەرى.

نەگىزى، ءمۇعالىم مەن جوعارى سىنىپ وقۋشىلارى اراسىنداعى توبەلەس وتكەن اپتادا بولعان. سوڭى توبەلەسكە ۇلاسقان كيكىلجىڭنەن ءمۇعالىم قولى سىنىپ اۋرۋحاناعا ءتۇسىپتى.

«وقيعا ساباق اياقتالعاننان كەيىن تۇستەن كەيىن بولدى. 11-سىنىپ وقۋشىلارى بىزدە ءبىرىنشى اۋىسىمدا وقيدى. توبەلەسكە قاتىسقان ءتورت وقۋشى. جانجالدىڭ نەدەن تۋعانىن ءبىز بىلمەيمىز. ءقازىر بۇل ماسەلەمەن پوليسيا اينالىسىپ جاتىر. جاس ماماننىڭ مەكتەپكە كەلگەنىنە ەكى-اق اي بولدى. وقيعاعا قاتىسى بار وقۋشىلار بۇعان دەيىن ەشقانداي ەسەپتە تۇرماعان، ءبارىنىڭ ۇلگەرىمى جاقسى. توبەلەسكەندەرى جايىندا ەستىگەندە، ءوزىمىز تاڭعالدىق. ءمۇعالىم اۋرۋحانادا جاتقان جوق، تۇرىپ ءجۇر، ءبىراق قولىندا گيپس. ازىرگە جۇمىسقا شىققان جوق، «بولنيچنىيدا». بالالار ساباققا كەلىپ ءجۇر. ولاردىڭ اتا-انالارىمەن كەزدەستىك، وقۋشىلار مۇعالىمنەن كەشىرىم سۇرادى. ول ولاردى كەشىرگەن سياقتى»، - دەپ بولعان جايت تۋرالى ايتىپ بەردى مەكتەپ ديرەكتورىنىڭ ورىنباسارى ءبيبىنۇر قاباتبەرگەنوۆا.

ءىىد-دان حابارلاعانداي، ءقازىر وقيعانىڭ ءمان-جايىن پوليسيا قىزمەتكەرلەرى انىقتاپ جاتىر.