كەلەسى جىلى الماتى جولدارىندا 1000-نان استام ۆيدەوكامەرا ورناتىلادى. بۇل تۋرالى الماتى قالاسىنىڭ اكىمى باۋىرجان بايبەكتىڭ، مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى ءتوراعاسىنىڭ ورىنباسارى اليك ىشپەكبايەۆتىڭ، اكىمدىك، ورتالىق مەمورگانداردىڭ اۋماقتىق دەپارتامەنتتەرى جانە «نۇر وتان»  پارتياسى وكىلدەرىنىڭ قاتىسۋىمەن سىبايلاس جەمقورلىققا قارسى ىس-ارەكەت ماسەلەلەرى بويىنشا وتكەن ءماجىلىس بارىسىندا بەلگىلى بولدى، - دەپ حابارلايدى Qamshy.kz قازاقپاراتقا سىلتەمە جاساپ.

وسىلايشا، سىبايلاس جەمقورلىققا جول بەرمەۋ، جولداردا پوليسەيلەرمەن بايلانىستى بولدىرماۋ اياسىندا 2017 جىلى قالا كوشەلەرى بويىنشا مىڭنان استام ۆيدەوكامەرا ورناتىلادى. 
 ا. ىشپەكپايەۆ ەلدەگى سىبايلاس جەمقورلىق قۇقىق بۇزۋشىلىق ستاتيستيكاسىن جاريالاپ، سىبايلاس جەمقورلىققا قارسى جۇرگىزىلگەن ساياساتتىڭ ارقاسىندا قازاقستان وسى باعىتتا كورسەتكىشتى جاقسارتىپ جاتقانىن اتاپ ءوتتى. «جەمقورلىق تاقىرىبى مەملەكەتتى عانا ەمەس، قوعامدى دا الاڭداتۋدا. بۇل كۇللى ەلدىڭ پروبلەماسى.

الەمدە 123ء-شى ورىندامىز. بۇل جەمقورلىق دەڭگەيى ەلدە جوعارى دەگەندى بىلدىرەدى. سىبايلاس جەمقورلىققا قارسى ساياساتتىڭ ارقاسىندا 2014-2016 جىلدارى 17 ساتىعا كوتەرىلدىك»، - دەدى ول.

«سوڭعى 1 جىل 9 ايدا 660 لاۋازىمدى تۇلعاعا ايىپپۇل سالىندى. وسىلايشا، وتكەن جىلى بيۋدجەتكە 3،5 ملرد. تەڭگە كەلىپ ءتۇستى. اگەنتتىك ءتوراعاسىنىڭ ورىنباسارى اتاپ وتكەندەي، كورسەتىلگەن مەرزىمدە ايىپپۇل تولەمەيتىن قىزمەتشىلەر باس بوستاندىعىنان ايىرۋ تۇرىندە جازاعا تارتىلادى. وسى كەزەڭدە 924 مەملەكەتتىك قىزمەتشىنىڭ مۇلكى تاركىلەندى، 1210 - ءومىر بويى مەملەكەتتىك قىزمەتتە جۇمىس ىستەۋ قۇقىعىنان ايىرىلدى».