اقتوبەدەگى اداسقان اعىمدارعا ەرىپ كەتكەندەرمەن جۇمىس ىستەۋگە بارعان قىزىلوردا قالاسى مەشىتىنىڭ يمامى دايراباي سەرىكباي ۇلى ساقال مەن سەنىم ماسەلەسىنە قاتىستى باتىل پىكىر ءبىلدىردى، - دەپ حابارلايدى Qamshy.kz NUR.KZ – كە سىلتەمە جاساپ.

«بۇل ساقالدىڭ وسكەنىنە 25 جىل بولدى. 1991 جىلدان باستاپ يماممىن. ول كەزدە سالافي دەگەن ۇعىم جوق بولاتىن. 25 جىل بولعان ساقالدى ءقازىر وزگەرتە المايمىن. اتالارىمىز قويعان ساقال. اباي دا، شاكارىم دە، احمەت تە ساقال قويعان. ءقازىر تەرروريزم شىقتى دەپ وعان وزگەرىس جاساي المايمىن. مەنىڭ ساقالىما ەشكىم ەشتەڭە ايتا المايدى. مەن يماممىن، مەملەكەتتىك قىزمەتكەر ەمەسپىن. مەنىڭ ءوز قۇقىم بار. سول ءۇشىن دە مەملەكەتتىك قىزمەتكە كىرگەن جوقپىن. ءقازىر قوعامدا تۇسىنىك بار. ساقالدى كورسە تەرروريست دەپ شىعادى. اسىرەسە، اقتوبەدە كوشەدە جۇرگەندە الا كوزبەن قاراپ جاتقاندى سەزەمىز. بۇرىن ونداي ەمەس، قۇرمەتپەن قارايتىن ەدى. تۇسىندىرمە جۇمىستارى جۇرسە، بولاشاقتا مۇنىڭ ءبارى شەشىلەدى»، - دەيدى اقتوبەگە 230 اداممەن ىلەسىپ كەلگەن ءتۇسىندىرۋ توبىنىڭ مۇشەسى، قىزىلوردا قالاسى مەشىتىنىڭ يمامى دايراباي سەرىكباي ۇلى.

بۇرىنعى باس ءمۇفتيدىڭ كومەكشىسى قولىندا قۇزىرەتى بار تانىمال ادامداردىڭ ءسالافيزمدى قولداپ وتىرعانىن اشىپ ايتىپ، قازاقستانداعى «اسىل ارنا» تەلەارناسىنىڭ كەمشىلىگىن تىزبەكتەپتى.

«ءوز ادامدارىن تىعىپ وتىرعان تانىمال ادامدار بار. ونەر، مادەنيەت سالاسىندا دا بار. ولاردىڭ اتىن اتاپ، ءتۇسىن تۇستەمەي-اق قويايىن. وزدەرىڭىز بىلەسىزدەر، «اسىل ارنانىڭ» ءبىر كەمشىلىگى بار. ولار ەشقاشان اۋليەنى مويىندامايدى. اۋليەلەر تۋرالى ەشقاشان باعدارلاما تۇسىرگەن ەمەس. ول - ۇلكەن كەمشىلىك. سەبەبى ءبىزدىڭ قازاق ارۋاق سىيلاعان»، - دەيدى ول.

ساقالدى يمام جات اعىمنىڭ جيىندارىن بىلە تۇرىپ، توسقاۋىل قويا الماعان مەملەكەتتى كىنالادى.

«مەن ءوزىم مۇسىلماندار ءدىني باسقارماسىندا باس ءمۇفتيدىڭ كومەكشىسى بولىپ جۇمىس جاسادىم. سول كەزدە «ءۋاحابيزمنىڭ بۇلىگى» دەگەن كىتاپ جازعان ەدىم. تاجىكستاندا سوعىس بولىپ تىيىم سالىندى، وزبەكستاندا تىيىم سالىندى. ءبارى قاشىپ شىمكەنتكە كەلدى. شىمكەنتتەن كەيىن قازاقستاننىڭ بارلىق قالالارىنا كەتتى. مەملەكەت ولاردىڭ تۇبىندە ءبىزدىڭ ەلگە كەلەتىنىنە سول كەزدە ءمان بەرگەن جوق. سالافيزمگە تىيىم سالماسا دا ولاردىڭ ۇستازدارىنىڭ الەۋمەتتىك جەلىدە ۋاعىز جۇرگىزۋىنە تىيىم سالۋ كەرەك. جاستار سوندا تارتىنادى. سالافيزمگە تىيىم سالۋدى حالىق تالاپ ەتىپ وتىر.  ءسالافيزمنىڭ مەحانيزمىن تاۋىپ، توقتاتۋ كەرەك. سەبەبى قانشاما ادامدى قۇرتىپ وتىر»، - دەيدى يمام.