بۇگىن الماتى قالاسىندا ق ر ۇلتتىق كىتاپحاناسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مادەنيەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنا دەپۋتاتتار بەرگەن تۇزەتۋلەردى قاراۋ بويىنشا جۇمىس توبىنىڭ وتىرىسى وتكىزىلدى، - دەپ حابارلايدى Qamshy.kz پورتالى.

وتىرىسقا ەلىمىزدىڭ مادەنيەت جانە قوعام بەلسەندىلەرىنىڭ ءبىرازى قاتىستى. سولاردىڭ ىشىندە ساياساتتانۋشى دوس كوشىم، ءازىمباي عالي، تەاتر ونەرى سالاسىنان ەسمۇحان وبايەۆ، ءاسانالى ءاشىموۆ، جازۋشىلاردان نۇرلان ورازالين، ولجاس سۇلەيمەنوۆ سىندى  قازاقتىڭ ءبىرتۋار ازاماتتارى وي ءبولىسىپ، جاڭا زاڭعا قاتىستى ءوز پىكىرلەرىن اشىق ءبىلدىردى. جيىندا تالقىلانعان ەڭ ۇلكەن ماسەلەلەردىڭ ءبىرى جازۋشىلار قالاماقىسىنىڭ كولەمى جايىندا بولدى.  جيىنعا ارنايى دايىندالعان ۆيدەسيۋجەتتە ءسوز سويلەگەن جاس اقىن ولجاس قاسىم  ءبىراز ادامدى مازالاپ جۇرگەن قالاماقى ماسەلەسى تۋرالى وي ءبىلدىرىپ، بىلاي دەدى:

ولجاس قاسىم: مەنىڭ كىتابىم 2012 جىلى «جالىن» باسپاسىندا «جاس تولقىن» سەرياسىمەن 2000 دانامەن شىقتى. كىتاپتىڭ قالاماقىسى ماسەلەن مەنىكى بەس باسپا تاباق بولسا، ءار باسپا تاباققا 25 مىڭ الدىم. ونىڭ وزىندە كىتاپتىڭ ءبىر داناسىن عانا قولعا تەگىن بەرەدى، قالعانىن ءوزىم ساتىپ الۋعا ءماجبۇر بولدىم.

وسى پىكىردەن كەيىن ءوز ويىن بىلدىرۋگە ءسوز العان اقىن ولجاس سۇلەيمەنوۆ ءوز ۇسىنىسىن ايتىپ، جاس ولجاستاردىڭ قالاماقىسى جونىندە وتكىر وي ءبىلدىردى:

 «كىتاپ — مەملەكەتتىڭ قورعاۋىندا بولۋى ءتيىس!  جاڭا جاس اقىن ولجاس  سۇحبات بەردى، مەنىڭ اتتاسىم. ءبىز مىنا جاس ولجاسقا ادەبيەتتە قانداي مۇرا قالدىردىق؟! 25 مىڭ تەڭگە ول شىعارماسىنا الدى، بەس تاباق باسپا، 100-دەن اسا بەت، جاس اقىننىڭ وسى ۋاقىتقا دەيىن جازعان تۋىندىسى، شىعارماشىلىعى. وسى العان 25 مىڭ تەڭگەنىڭ ءبارىن دە ول ءوز كىتابىن الۋعا جۇمسادى. ارى قاراي ءشاي-تۇزىنا نە قالدىردى؟! ءبىزدىڭ نارىق الىپ-ساتۋدان عانا تۇرادى، باسقا ەشتەڭە جوق. مىنانداي جاعدايدا ءبىرىنشى زارداپتى كىتاپ شەگەدى. حالىق قىمبات كىتاپ الا المايدى، ال ارزان كىتاپ جوق. كەڭەس وداعى كەزىندەگى كىتاپ  تاراتۋ جۇيەسى ، جازۋشىلاردى قامتاماسىز ەتۋ جاعدايى، جازۋشىلار وداعىنىڭ قورى باسپانامەن، قالاماقىمەن قامتاماسىز ەتتى، ال ءقازىر ونىڭ ءبىرى دە جوق. مەن 25 جىل ىشىندەگى جاڭا بيلىك كەزىندە بىردە-بىر رەت ءبىر تەڭگە  قالاماقى العان ەمەسپىن، وسى ۋاقىتتار ىشىندە مەنىڭ ءبىراز كىتاپتارىم شىقتى. ەندى، ويلانىڭىز جەتەكشى جازۋشىلاردىڭ ءبىرى سانالاتىن مەن  ءبىر تەڭگەدە الا المادىم، ال مىنا ەندى باستاپ كەلە جاتقان ولجاستار جايلى نە ايتۋعا بولادى؟!  مەن باسقا دا مەملەكەتتىك قىزمەتتەردى اتقارىپ، باسقا جالاقىلار الدىم. ءبىراق، مەن كاسىبي جازۋشى رەتىنە ءوز ەڭبەكاقىمدى العىم كەلدى. ءبىراق، ءقازىر جازۋشى مامانى سىزىلىپ تاستادى. ءقازىر ءتىپتى ولار جوق. كاسىبي ماماندار جوق، تەك سۇيىكتى ءىس رەتىندە اينالىساتىندار عانا بار. ولاردىڭ ءوزى شىعارمالارىنىڭ باسىلعانىن كورىپ، تۋعان-تۋىس، تانىستارىنا ماقتان ءۇشىن تاراتسا، سوعان دا ءماز.  جانە بۇدان 20-شى عاسىردا  عانا حاتقا تۇسكەن قازاق ادەبيەتى قاتتى زارداپ شەگىپ وتىر، ەندى قايتا فولكلورعا اينالىپ بارادى. بۇل نە دەگەن سۇمدىق؟! 25 جىلداعى جەتىستىگىمىز وسى ما، مەنىڭ شە بۇل ۇلكەن ورنى تولماس جوعالتۋ. ءبىز جانە وسىنداعى زاڭدى تۇلعالار  «قازاق ادەبيەتىن تۇبىرىمەن قالاي جويماۋ كەرەك» دەگەن نارسەگە الاڭداۋ كەرەكپىز.  ورىس ادەبيەتى ولمەيدى. ال، ەندى عانا جازۋدى باستاعان قازاق ادەبيەتى ۇلكەن سوققى الدى.

مەن جاقىندا ەۋروپادا فرانسيا، يتاليا ەلدەرىندە بولدىم. ولاردىڭ تاجىربيەسىن قاراپ وتىرساق،  «چامپي زاڭى»بويىنشا يتاليانىڭ بارلىق جەكە  مەنشىك بانكتەرى تابىستارىنىڭ بەلگىلى ءبىر پايىزىن ريمدە ورنالاسقان قوعامدىق  مادەني ۇيىمدارعا بولۋگە مىندەتتى.  ولاردىڭ جالپى سانى 80-گە جەتەدى. ءار كىشكەنتاي قالانىڭ ءوز بولىمشەسى بار. سوندىقتان ءجۇز مىڭدىق پوردەنونە جىل سايىن مادەنيەت ءمينيسترىنىڭ كومەگىنسىز-اق اكسيالار مەن فەستيۆالدەر وتكىزە الادى. وسىنىڭ ارقاسىندا ولار ادەبيەت پەن مادەنيەتتە، كلاسسيكالىق مادەنيەتتە ءبىراز جەتىستىكتەرگە جەتتى»- دەپ تۇيىندەدى ءسوزىن ولجاس مىرزا.  ءسوز اراسىندا جۇمىس توبىنا جەتەكشىلىك ەتىپ وتىرعان بەكبولات تىلەۋحان 25 مىڭ تەڭگە قالاماقىعا  ءبىر باتەڭكەنىڭ قۇنىنا دا تۇرمايتىن اقشا ءبولىنىپ جاتقانىنىڭ مۇلدەم ۇيات جاعداي ەكەنىن جانە وسى تۋرالى زاڭعا وزگەرىستىڭ كەرەك ەكەنىن ايتتى. 

قورتىندى ءسوز كەزەگىن العان  پارلامەنت ءماجىلىسى ءتوراعاسىنىڭ ورىنباسارى گۇلميرا يساتايبەك قىزى بىلاي دەدى: «قازاقتىڭ ارىق ايتىپ، سەمىز شىق» دەگەن ءسوزى بار، سىزدەرگە تارقاتىپ ايتساق بۇدان بىلاي مەملەكەت قانداي دا ءبىر رەداكسياعا كەلىپ وتىرعان جازۋشىنىڭ شىعارماسىن قوعامعا، رۋحانياتقا كەرەك دەپ تانىسا، اۆتوردان ساتىپ الىپ، سول شىعارماسىنا قالاماقى تولەيدى. بۇگىنگى ۇكىمەتتىڭ جاساعان جوباسى بويىنشا گونورار قۇنى ءبىر باسپا تاباققا 150 مىڭ تەڭگە بولادى.