تۇركيا قورعانىس ونەركاسىبى كوميتەتى جاعىنان كۇندىز دە، تۇندە دە، جاڭبىردا، قار مەن تۇمان سياقتى زور اۋا رايى جاعدايلارىندا دا، بۇلتتىڭ ۇستىنەن دە بارلاۋ-باقىلاۋ جاساۋ مۇمكىندىگى بار ANKA Blok B ۇشاعىنا ينتەگراسيا ءساتتى اياقتالدى دەپ حابارلايدى تۇرىكتىڭ انادولى اگەنتتىگى. اتالعان بارلاۋ ۇشاعى ءتىپتى قويۋ تۇمان، قالىڭ بۇلتتى كليمات جاعدايىندا دا ۇشا الادى دەپ مالىمدەگەن ۇشاقتى جاساۋشىلار.

تۇركيا قورعانىس ونەركاسىبى كوميتەتى سونداي-اق، ۇزاق ۋاقىت اۋەدە جۇرەتىن MALE ۇۇا جۇيەسىن دە قوسقان. وسىنىڭ ارقاسىندا تۇركيا ۇشقىشسىز ۇشۋ اپپاراتتارىن وندىرەتىن ەلدەر اراسىنان ورىن تاپتى.

ايتا كەتەر بولساق، تۇركيا «15 شىلدە» قاندى وقيعاسىنان كەيىن قورعانىس سالاسىنداعى تەحنولوگيانى تۇگەلدەي ءوز قولىنا الاتىنىن حابارلاعان ەدى. وعان، سول توڭكەرىسكە ارەكەت بولعان ءتۇنى توڭكەرىسشىلەر ۇشىرعان F16 ۇشاقتارىن جويۋعا تۇركيانىڭ توڭكەرىسشىلەر قولىنا تۇسپەگەن اسكەري اۋە بازاسىنداعى F16 ۇشاقتارىن ۇشىرا الماۋى سەبەپ بولعان ەدى. اتالعان سوعىس ۇشاعىن وندىرگەن اقش، ۇشاقتىڭ ءدال ءوز «تۋىستارىنا» مۇلدە شابۋىل جاسامايتىن ەتىپ پروگراممالاعان. ەسكە سالساق، سول ءتۇنى توڭكەرىسشىلەر ۇشىرعان F16 ۇشاقتارى ىستامبۇل مەن انكارا كوگىندە حالىققا قاتەر توندىرگەن بولاتىن، ءتىپتى تۇركيانىڭ پارلامەنت عيماراتىن دا بومبالاپ ەدى.

بۇعان دەيىن تۇركيا قورعانىس سالاسىندا 2013 جىلى كوپ فۋنكسيالى «التاي» اتتى تانك ومىرگە كەلگەن ەدى. اتالعان تانك تە ءتۇرلى اۋارايى مەن جەر جاعدايىندا قوزعالا ءجۇرىپ شابۋىلداۋ مۇمكىندىگىنە يە.

تۇركيا سونىمەن قاتار تەڭىز قارۋلى كۇشتەرى ءۇشىن دە 1999 جىلى GENESİS اتتى باعدارلاما جاساپ، ءوز سۇڭگۋىر كەمەلەرىن، تەڭىز رادارى، سوعىس كەمەلەرىن وندىرە باستاعان بولاتىن.