ءبىرىڭعاي زەينەتاقى جيناقتاۋشى قورىنىڭ باسقارما ءتوراعاسى رۋسلان ەردەنايەۆ قازاقستاندا زەينەتاقى جيناقتارىن مەرزىمىنەن بۇرىن الۋ ماسەلەسىن قوزعاۋعا ءالى ەرتە دەپ سانايدى. ول ءۇشىن جيناقتاۋشى زەينەتاقى جۇيەسىنە بارلىق ەڭبەككە جارامدى ازاماتتار قاتىسۋى قاجەت. دەگەنمەن، بۇگىندە اتالعان ماسەلە ۇكىمەت دەڭگەيىندە تالقىلانىپ جاتىر، - دەپ xابارلايدى قازاقپارات.
«ءبىز ءقازىر سينگاپۋر، مالايزيا، سونداي-اق ءبىرقاتار كورشى ەلدەردىڭ زەينەتاقى جۇيەسىن ساراپتاپ جاتىرمىز. ءبىر ايتا كەتەتىن جايت، شەت ەلدەردە زەينەتاقى جيناقتارى مەرزىمىنەن بۇرىن مىندەتتى تۇردە سالىمشىنىڭ دەنساۋلىعىن نىعايتۋعا جانە ونى باسپانامەن قامتاماسىز ەتۋگە جۇمسالادى. ول ءۇشىن جەكە زەينەتاقى شوتىندا جيناق جەتكىلىكتى كولەمدە بولۋى كەرەك. ياعني، زەينەتاقى جيناعىنىڭ كولەمى زەينەتكەردىڭ كەم دەگەندە ەڭ تومەنگى كۇنكورىس دەڭگەيىن قامتاماسىز ەتۋگە جەتكىلىكتى بولۋى ءتيىس. ال زەينەتاقى جيناقتارى جەتكىلىكتى كولەمدە بولۋى ءۇشىن الەم ەلدەرىندە ەرىكتى زەينەتاقى جارنالارىن تارتۋ جۇمىستارى قارقىندى تۇردە جۇرگىزىلىپ كەلەدى. دەمەك، ەلىمىزدە جيناقتاۋشى زەينەتاقى جۇيەسىنە بارلىق ەڭبەككە جارامدى ازاماتتار قاتىسۋى ءتيىس جانە ەرىكتى زەينەتاقى جارنالارىن تارتۋ جۇمىستارىن بارىنشا دامىتۋ قاجەت. ونسىز زەينەتاقى جيناقتارىن مەرزىمىنەن بۇرىن الۋ ماسەلەسىن شەشۋ مۇمكىن ەمەس. ءقازىر، بۇل ماسەلە ۇكىمەت دەڭگەيىندە تالقىلانىپ جاتىر»، - دەپ جاۋاپ بەردى ر.ەردەنايەۆ «قازاقپاراتتىڭ» رەسمي ساۋالىنا.
ايتا كەتەيىك، بۇگىندە قازاقستاندىقتار بارلىعى بىردەي زەينەتاقى سالىمدارىن مەرزىمىنەن بۇرىن الا الماسا دا، اقشانى ەرىكتى تۇردە سالىپ جاتقان ازاماتتارعا 50 جاسقا كەلگەندە ونداي مۇمكىندىك بەرىلىپ وتىر. بۇدان بولەك، I جانە II توپتاعى مۇگەدەكتەر دە زەينەتاقى سالىمدارىن مەرزىمىنەن بۇرىن الا الادى. سونداي-اق زەينەتاقى اننۋيتەتىن ساتىپ العان 50 جاستاعى ايەلدەر مەن 55 جاستاعى ەر ادامدارعا ول اقشانى پايدالانۋعا رۇقسات بار.
ايتا كەتەيىك، بجزق-ىندا 10،1 ملن. زەينەتاقى سالىمدارى بار. سونىڭ باسىم بولىگى - 9،6 ملن.-ى مىندەتتى زەينەتاقى سالىمدارىنىڭ ۇلەسىندە. قازىرگى كەزدە قازاقستاندىقتار سالعان جيناقتاردىڭ جالپى سومماسى 6،2 تريلليون تەڭگەنى قۇراپ وتىر.
