تاجىكستان پرەزيدەنتى «ۇلت كوسەمىنە» ءتىل تيگىزۋشىنى جازالاۋ زاڭىنا تۇزەتۋ ەنگىزۋ جوباسىنا قول قويدى، دەپ حابارلايدى «قامشى» پورتالى.

تاجىكستان پارلامەنتىنە جونەلتىلەتىن وسى جوبا بويىنشا، اقپارات قۇرالدارى مەن عالامتور كەڭىستىگىندە وسى ەلدىڭ پرەزيدەنتىنە ءتىل تيگىزەتىن ادامدار بەس جىل باس بوستاندىقتارىنان ايرىلاتىن بولادى. وسى جوبا بەكىتىلگەن جاعدايدا تاجىكستاننىڭ سوت مەكەمەلەرى پرەزيدەنتكە ءتىل تيگىزۋشى كىسىلەردى قاماۋ جازاسىنىڭ ورنىنا ولاردى قارجىلاي ايىپ تولەتىپ تە جازالاي الادى.

ەسكە سالاتىن بولساق، بىلتىر عانا جەلتوقسان ايىندا تاجىك پارلامەنتى پرەزيدەنت ەمومالي راحمونعا «ۇلت كوشباسشىسى» مارتەبەسىن بەرەتىن زاڭ جوباسىن ماقۇلدادى. وندا راحموندى سوتقا تارتۋعا بولمايتىنى جازىلعان. بۇل زاڭ بويىنشا سوۆەت وداعى قۇلاعالى (1991 جىل – رەد.) تاجىكستان بيلىگىن ەشكىمگە بەرمەي كەلە جاتقان 63 جاستاعى بۇرىنعى سوۆحوز (كەڭەستىك شارۋاشىلىق فەرماسى – رەد.) ديرەكتورىنىڭ وتباسى مۇشەلەرى دە قورعالادى. ياعني، راحمون اۋلەتىنىڭ مۇشەلەرى مەن ولاردىڭ مۇلىكتەرىنە تيىسۋگە بولمايدى.

سونداي-اق، بيىلعى جىلدىڭ 23 مامىرىندا تاجىكتەر ەمومالي راحموننىڭ ءومىر بويى پرەزيدەنت بولۋىن داۋىسقا سالىپ رەفەرەندۋم وتكىزگەن بولاتىن. وعان سايكەس، كونستيتۋسياعا وزگەرىستەر ەنگىزۋدى قولداپ 94،5 پايىز سايلاۋشى داۋىس بەرگەن. «كونستيتۋسياعا وزگەرىستەر ەنگىزۋگە 134،121 مىڭ ادام نەمەسە قاتىسۋشىنىڭ 3،3 پايىزى عانا قارسى داۋىس بەردى» دەپ مالىمدەدى تاجىكستان ورتالىق سايلاۋ كوميسسياسى.

وسى رەفەرەندۋم اياسىندا تاجىكستاننىڭ قازىرگى پرەزيدەنتى ەمومالي راحمون بيلىكتە شەكسىز قالۋعا مۇمكىندىك العان ەدى. سونىمەن بىرگە پرەزيدەنتتىككە ۇمىتكەر بولا الاتىن ادامداردىڭ ورتاشا جاسىن 35-تەن 30 جاسقا ءتۇسىردى. ياعني تاجىكستان باسشىسىنىڭ ۇلكەن ۇلىنا كەلەسى پرەزيدەنت سايلاۋىنا قاتىسۋعا جول اشادى.

ەندى بۇدان بىلاي تاجىكستان كونستيتۋسياسى بويىنشا ءدىني جانە ۇلتتىق سيپاتتا ساياسي پارتيا قۇرۋعا دا تىيىم سالىنعان بولاتىن.