بۇگىن استانا قالاسىنداعى مامانداندىرىلعان اۋدانارالىق قىلمىستىق ىستەر جونىندەگى اسكەري سوت توقتار تولەشوۆ پەن ونىڭ سىبايلاستارىنا قاتىستى ۇكىم شىعاردى، دەپ حابارلايدى «قامشى» پورتالى.

سوت باس ايىپتالۋشى توقتار تولەشوۆتى كiءنالi دەپ تاۋىپ، مۇلكىن تاركىلەۋمەن 21 جىلعا باس بوستاندىعىنان ايىردى. ول جازاسىن قاتاڭ رەجيمدى كولونيادا وتەيدى.

توقتار تولەشوۆكە «حالىقارالىق قىلمىستىق قاۋىمداستىقتىڭ بەلدى وكىلى رەتىندە قىلمىس الەمىنىڭ بەدەلدى مۇشەلەرىن قارجىلاندىرعان» دەگەن ايىپ تاعىلعان. ناقتى ايتقاندا، ول «براتسكيي كرۋگ» ترانسۇلتتىق قىلمىستىق قاۋىمداستىعىمەن تىعىز قارىم-قاتىناس قۇرىپ، ونىڭ كوشباسشىلارى مەن بەدەلدى مۇشەلەرىنە قارجىلاي كومەك كورسەتىپ وتىرعان. تەرگەۋ ناتيجەسىندە تولەشوۆتىڭ توقساننان استام ارنايى دايىندىقتان وتكەن جاۋىنگەرى بولعانى انىقتالدى. بەلگىلى بولعانداي، ونىڭ قىلمىستىق توبى ادامداردى ۇرلاپ، ولتىرگەن.

بۇدان بولەك، اتىراۋدا «جەر ميتينگىلەرىن» وتكىزگەن ماكس بوقايەۆ پەن تالعات ايانوۆتىڭ ءىسى بويىنشا دا توقتار تولەشوۆ ايىپتى دەپ تانىلعان. ول بويىنشا اتىراۋدا وتكىزىلگەن زاڭسىز شەرۋدى ول قارجىلاندىرعان.

ەسكە سالا كەتەيىك، توقتار تولەشوۆ بيىل 30 قاڭتاردا شىمكەنت قالاسىندا ۇستالعان بولاتىن. باس كۇدiكتi مەن ونىڭ سىبايلاستارىنان قارۋ، ەسىرتكى جانە بەلگىلى ءبىر ادەبيەتتەر تاركىلەندى. شىمكەنتتىك كاسىپكەرگە بارلىعى قىلمىستىق كودەكستىڭ 15 بابى بويىنشا ايىپ تاعىلدى. ماۋسىم ايىنىڭ باسىندا ۇلتتىق قاۋىپسىزدىك كوميتەتى تولەشوۆ پەن ونىڭ سىبايلاستارى ەلدەگى بيلىكتى كۇشپەن باسىپ الۋعا دايىندىق جاساعانىن حابارلادى.

تولەشوۆ ىسىنە قاتىستى سوت استانادا 14 قىركۇيەكتە باستالدى. بارلىعى 25 كۇدىكتى. سوت پروسەسىنە 16 قورعاۋشى، 104 كۋاگەر، 17 جابىرلەنۋشى جانە 2 وكىلى قاتىستى. قىلمىستىق ءىس 300 تومنان تۇرادى. توقتار تولەشوۆتىڭ سوتى جابىق رەجيمدە ءوتتى.