ساۋد ارابياسىندا تەررورلىق ارەكەت جاساماق بولدى دەپ ايىپتالعان قازاقستاندىق بەس ستۋدەنت ەلگە قايتارىلدى،- دەپ حابارلايدى "استانا" ارناسى.
تاعى ءبىر وتانداسىمىزعا قاتىستى تەرگەۋ امالدارى ءجۇرىپ جاتىر. بۇل تۋرالى كورولدىكتەگى قازاقستاننىڭ توتەنشە جانە وكىلەتتى ەلشىسى باقىت باتىرشايەۆ ايتىپ بەردى. ەلشىنىڭ سوزىنشە، ساۋد ارابياسىندا قازاقستاندىق 95 ستۋدەنت ءبىلىم الىپ ءجۇر. ولاردىڭ 60-قا جۋىعى مەدينا قالاسىنداعى يسلام ۋنيۆەرسيتەتىندە وقيدى.
"بۇل ۋنيۆەرسيتەتكە بۇكىل الەمنەن ءتۇرلى ادامدار، ءتۇرلى كوزقاراستارىمەن كەلەدى. سوندىقتان باسقا اعىمعا كەتىپ قالۋ ءقاۋپى بار دەپ ايتا الامىن. ونىڭ كەي نىشاندارىن ءبىز بايقاپ تا وتىرمىز. بىزدە ستۋدەنتتەرمەن جۇمىس وتە قاتاڭ باقىلاۋدا. ءاردايىم ولارمەن بايلانىستامىز. قاي باعىتتا قانداي يدەولوگيا بويىنشا ءبىلىم الىپ جاتقاندارىن قاراپ وتىرامىز"، - دەيدى ساۋد ارابياسى كورولدىگىندەگى توتەنشە جانە وكىلەتتى ەلشىسى باقىت باتىرشايەۆ.
