ۇكىمەتتىڭ ۇلتتىق قوردىڭ تۇبىنە جەتەتىن ءتۇرى بار. بۇگىن ءۇش جىلدىق بيۋدجەتتى بەكىتكەن دەپۋتاتتار وسىلاي دەپ دابىل قاقتى. داعدارىس كەزىندە قاجەت  اقشانى مينيسترلەر وڭدى-سولدى شاشىپ ءجۇر دەيدى ماجىلىسمەندەر. سوندىقتان ءماجىلىس بيۋدجەت تاپشىلىعىن سىلتاۋراتىپ، ۇلتتىق قورعا قايتا-قايتا  قول سۇعۋدى دوعارۋدى تالاپ ەتتى. ءبىراق مينيسترلەر كابينەتى بيىل حالىقتىڭ تۇرمىسىن كوتەرىپ الەۋمەتتىك سالاعا كوپ كوڭىل بولەتىندەرىنە سەندىرۋدە. 

بۇل تۋرالى كتك ارناسى حابارلايدى.  

باستى قارجىلىق قۇجاتتى قورعاۋعا كەلگەن باقىتجان ساعىنتايەۆقا    بيۋدجەتتى  بەكىتۋ  وڭايعا سوققان جوق. دەپۋتاتتار الداعى ءۇش جىلدىق  شىعىن جانە تابىسپەن تانىسا سالىسىمەن، مينيسترلەر كابينەتىنە  دۇرسە قويا بەردى.

ازات پەرۋاشيەۆ، ءماجىلىس دەپۋتاتى:

-الداعى ءۇش جىلدا ۇلتتىق قورداعى قارجى 9،5 ميلليارد دوللارعا ازايىپ قالادى ەكەن. ءتۇسىمى دە تومەندەيدى. سىزدەر بيۋدجەتتىڭ كەز-كەلگەن شىعىنىن ۇلتتىق قورداعى قارجىمەن جابۋدى ادەتكە اينالدىرىپ الدىڭىزدار. بۇل تۇرلەرىڭىزبەن قورداعى اقشانى تاۋىسىپ بىتىرەسىزدەر.

ۇلتتىق  قورداعى اقشا وڭدى-سولدى جۇمسالىپ جاتىر دەگەن جانايقايعا شەنەۋنىكتەر سەلت ەتە قويمادى. ەسەسىنە، بيۋدجەت بەكىتىلسە  جۇرتتىڭ تۇرمىسى تۇزەلەرىنە سەندىرىپ باقتى.  

باقىت سۇلتانوۆ، قارجى ءمينيسترى:

-جىلىنا 47 مىڭ ازاماتتى جۇمىسپەن قامتۋ قاراستىرىلادى. ول ءۇشىن ءۇش جىلدىق بيۋدجەتتە  113،5 ميلليارد تەڭگە جوسپارلانادى. ەكىنشىدەن، «بيزنەستىڭ جول كارتاسى»  باعدارلاماسى بويىنشا كاسىپكەرلىكتى قولداۋ ءۇشىن الداعى ءۇش جىلعا 46 ميلليارد تەڭگە قارالادى.  قولجەتىمدى تۇرعىن ۇيگە  143 ميلليارد تەڭگە.

ەكىنشى كەزەكتە ءبىلىم بەرۋ سالاسى تۇر. ماسەلەن، اپاتتىق  جاعدايدا تۇرعان مەكتەپتەردى جوندەۋگە جانە جاڭا وقۋ ورنىن سالۋ ءۇشىن بيۋدجەت پەن ۇلتتىق قوردان 94 ميلليارد تەڭگە جۇمسالماق. سونداي-اق، بازالىق زەينەتاقى دا  9 پايىزعا وسەدى ەكەن. ينفلياسيا دەڭگەيى ءبىر قالىپتى، بيۋدجەتتىڭ تاپشىلىعى دا بەلگىلەنگەن مولشەردەن اسپايتىن كورىنەدى. ءبىراق بۇعان دەپۋتاتتار الدانا قويمادى.

نۇرتاي سابيليانوۆ، ءماجىلىس دەپۋتاتى:

ء-بىز جىلىنا بىرنەشە رەت  وسى رەسپۋبليكالىق بيۋدجەتتى ناقتىلايمىز. ۇكىمەت تە ءوز تاراپىنان كوپتەگەن تۇزەتۋلەر ەنگىزەدى. سايىپ كەلگەندە ۇكىمەت تۇپكىلىكتى ناتيجەگە قول جەتكىزەتىن بيۋدجەتتى قامتاماسىز ەتە الماي وتىر. مەملەكەتتىك باعدارلامالار تولىق ورىندالمايدى، كورسەتكىشتەر ورىندالمايدى، ەسەپ بەرىلمەيدى.

بيۋدجەتتى قايتا قاراۋعا ءالى تالاي كەلەتىندەرىن پرەمەردىڭ ءوزى دە  مويىنداپ وتىر.  تابىس پەن شىعىن  مۇناي باعاسىنا تىكەلەي تاۋەلدى بولعاندىقتان، قارجىلىق قۇجاتتى بىرنەشە رەت وزگەرتۋگە ءماجبۇرمىز دەيدى ساعىنتايەۆ.

باقىتجان ساعىنتايەۆ، پرەمەر-مينيستر:

-مۇنايدىڭ باعاسى گەوساياسي جاعدايلارعا وتە تاۋەلدى. وعان قوسىمشا يراكتاعى، سيرياداعى بولىپ جاتقان جاعدايلار دا كوپ اسەرىن تيگىزىپ وتىر. سول سەبەپتەن دە بۇگىن تالقىلاۋعا سالىپ وتىرعان بيۋدجەتكە قاراساق،  كىرىستەردىڭ 45 پايىزى نەگىزىنەن مۇناي سالاسىنا تۇسكەن قارجىعا تاۋەلدى.

دەپۋتاتتار باستى قارجىلىق قۇجاتتى ءتورت ساعاتقا جۋىق تالقىلاپ، ۇزاق تارتىسقانىمەن، سوڭىندا ءبىر اۋىزدان قولداپ داۋىس بەردى. ءبىر انىعى ۇكىمەت الداعى ءۇش جىلدا 25 تريلليون تەڭگە جۇمساماق. ال بيۋدجەت مۇنايدىڭ باررەلى 35 دوللارمەن ەسەپتەلگەن. «قارا التىننىڭ قۇنى» ءجيى قۇبىلاتىنىن ەسكەرسەك، ءتۇرلى سالاعا بولىنگەن ميلليوندار كەز-كەلگەن ساتتە قىسقارتىلۋى مۇمكىن.