ينتەرنەتتە ريزابەك باتتال ۇلىنىڭ قىزداردىڭ ورامال تاعۋ ماسەلەسى تۋرالى بيلىككە قاراتا ايتىلعان سىن-ەسكەرتپەسى جاريالاندى، دەپ حابارلايدى "قامشى" پورتالى. وندا ول، ورامال تاعۋ ماسەلەسى تۋرالى بيلىكتى مۇسىلماندارمەن مامەلەگە كەلۋگە شاقىرادى.

ريزابەك باتتال ۇلى — «ءال-ازھار» ۋنيۆەرسيتەتىنىڭ «حاديس» ءبولىمىنىڭ تۇلەگى. ريزابەك ۇستاز شەيح حازيم كايلاني، شەيح حامداللا، شەيح دجامال فارۋح، شەيح مۋستافا كيناۋي سياقتى حانافي شەيحتارىنان جانە باسقا دا اتى تانىمال ءارى سىيلى عالىمداردان ساباق العان.

ايتا كەتەر بولساق، قازاننىڭ 19-ى كۇنى قازاقستاننىڭ ءۇش بىردەي مينيسترلىگى: ءبىلىم جانە عىلىم، ادىلەت، ءدىن جانە ازاماتتىق قوعام مينيسترلىكتەرى قازاقستان زاڭناماسىنا سايكەس ءدىني باعىتتاعى كيىمدەردى مەكتەپكە كيۋگە تىيىم سالىنعانىن مالىمدەدى.

بۇعان بايلانىستى: "ءدىني ەرەكشەلىگى بار كيىم، ورامال، حيدجاب جانە ت.ب. كيۋگە جول بەرىلمەيدى جانە بۇعان دەيىن دە تىيىم سالىنعان. زاڭنامانىڭ نورمالارى بارلىق ۇلتقا ورتاق. ءدىني كيىمدى تەك ءبىلىم مەكەمەسىندە كيۋگە بولمايدى. ونىڭ سىرتىنان تىس جەردە نە كيسە دە ءوز ەركى. ولاردىڭ ءدىني كوزقاراسىنا شەكتەۋ جوق. ەشكىم دە بالانىڭ كيىمىن كۇشتەپ شەشە المايدى. ازىرگە «بالامدى مەكتەپكە كىرگىزبەدى» دەگەن شاعىم تۇسكەن جوق. ءبىز وقۋشى قۇقىعىن بۇزبايمىز. ءبىراق ولاردىڭ دا ەرەجەنى بۇزۋىنا جول بەرمەيمىز"، - دەگەن ەدى ءبىلىم جانە عىلىم ۆيسە-مينيسترى ەلميرا سۋحانبەردييەۆا.

ال، قازاننىڭ 24ء-ى كۇنى قازاقستان مۇسىلماندارى ءدىني باسقارماسى (قمدب) وقۋشى قىزداردىڭ مەكتەپكە ورامال (حيدجاپ) تاعىپ بارۋىنا بايلانىستى "مۇسىلمان جاماعاتى مەن اتا-انالاردى وقۋ ورىندارى باسشىلارىمەن ورتاق مامىلەگە كەلۋگە" شاقىرعان بولاتىن.

قمدب يسلامدا شاريعات تالابى بويىنشا اتا-اناسى كامەلەتتىك جاسقا تولماعان قىزىنا ورامال تاققىزىپ، جالپىعا ورتاق ءبىلىم الۋىنا تىيىم سالماۋى ءتيىس ەكەنىن ايتادى. مالىمدەمەدە «اتا-انالار قازاقستانداعى ءبىلىم بەرۋ جۇيەسى وقىتۋدى عانا ەمەس، ادامدى ونەرگە، سپورتقا، زياتكەرلىك دامىتۋعا باعىتتالعانىن سەزىنۋى كەرەك" دەپ جازىلعان.

سونداي-اق، ءدىني باسقارماسىنىڭ ورامالعا قاتىستى 2013 جىلى شىعارعان ءپاتۋاسى دا بار.