الماتى وبلىسىنىڭ قاراساي اۋدانىندا تۇراتىن اقساقال شەنەۋنىككە شاعىم ايتامىن دەپ، ودان تاياق جەگەنىن العا تارتۋدا. اتقامىنەردى بىرنەشە كۇن بويى جۇمىس ورنىنان تاپپاعان تۇرعىن تاڭەرتەڭ باسشىنىڭ ۇيىنە بارىپ، اقىر سوڭىندا ميى شايقالىپ، بەتى مەن كەۋدەسى كوگەرىپتى. اكىمگە جابىرلەنۋشىنىڭ ايتقان اقىلى ۇناماعان كورىنەدى. ال وسى وقيعادان بەرى ەكى كۇن وتسە دە، پوليسەيلەر بولعان جايتتى اۋدان باسشىلىعىنا حابارلاماعان ەكەن.
بۇل تۋرالى كتك ارناسى حابارلايدى.
66 جاستاعى تولەندى تاڭاتاروۆ اكىمنىڭ «ەرەكشە» قابىلداۋىنان كەيىن دەنەسىندە قالعان بەلگىلەردى كورسەتۋدە. اتقامىنەردىڭ سوققىسىنان ونىڭ ميى شايقالىپ، بەتى مەن كەۋدەسى كوگەرىپتى. ءبىرىنشى ماي اۋىلدىق ايماعىنىڭ باسشىسىن اكىمدىككە سان رەت ىزدەپ بارىپ تاپپاي قايتقان جابىرلەنۋشى ونىمەن ۇيىندە كەزدەسپەك بولعان ەكەن. ءبىراق بۇنىسى شەنەۋنىككە ۇناماعان كورىنەدى. ال زەينەتكەردىڭ ايتپاعى – ارىق ماسەلەسى ەكەن.
تولەندى تاڭاتاروۆ، قاينار اۋىلىنىڭ تۇرعىنى:
–تاۋدان اعاتىن سۋدىڭ بارلىعى وسىمەن اعىپ، بىلاي قاراي كەتەتىن ءبىزدىڭ ءۇيدىڭ جانىنان. سول-اق ەكەن، «سەن كىمسىڭ، ماعان اقىل ايتاتىن، سەنى جوق قىلىپ جىبەرەمىن»دەپ جۇدىرىقپەن ۇردى. تاياعىم ۇشىپ كەتتى. ودان كەيىن جاعامنان سۇيرەپ، ۇيگە كىر دەيدى. كاليتكاسىنا كىرگىزىپ، ۇردى.
زەينەتكەردىڭ ايتۋىنشا، جۇدىرىق جۇمساۋعا اكىمنىڭ ۇلى دا قارسى بولماپتى. ەكى جاقتاپ قول كوتەرگەندەر ونى كىشىگىرىم اۋىلدا الىستان كوزگە ءتۇسىپ، وزگەلەردەن ەرەكشەلەنەتىن مىنا سارايدا ءبىر ساعات ۇستاپ، كەيىن جىبەرگەن. بۇل ءۇي – ءبىرىنشى ماي اۋىلدىق ايماعىنىڭ اكىمى مۇراتبەك قارناقوۆتىڭ باسپاناسى. ءبىر قىزىعى تەنتەك اكىمنىڭ ۇستىنەن ارىز جازىلعان سوڭ ۇزاقتان بەرى شەشىلمەي كەلە جاتقان ارىق ماسەلەسى بىردەن قولعا الىنعان.
–مەن تاياق جەگەننەن كەيىن قولعا الدى. كەشەلى بەرى قازىپ جاتىر. كومەك سۇرايمىن دەپ بارىپ، تاياق جەپ كەتتىم. اكىم – حالقىڭا جاقىن بول دەيدى، بۇنىڭ ىستەگەنى وسى. مەنەن باسقا ادامداردى دا ۇرعان شىعار.
اكىمنىڭ ەرەكشە سويلەسۋ ءستيلى تۋرالى اۋدان باسشىلىعى حابارسىز بولىپ شىقتى. ولار بۇنداي وقيعانىڭ بولعانىن ەستىمەدىك دەپ ات-توندارىن الا قاشۋدا.
–ياعني ول كىسىگە قاتىستى ەشقانداي شارا قولدانبادى عوي؟
-ونى سىزدەن ءبىرىنشى رەت ەستىپ وتىرمىن .
ال كۇزەتشى مەن بەينەكامەرا ورناتىلماعاندىقتان قاقپانى ۇنەمى جاۋىپ جۇرەمىز، سوندىقتان بوتەن ادامنىڭ ۇيگە كىرۋى مۇمكىن ەمەس دەگەن قارناقوۆ ەشكىمدى ۇرىپ-سوقپاعانىن ايتىپ، وزىنە شاڭ جۋىتپاي وتىر.
مۇراتبەك قارناقوۆ، ءبىرىنشى ماي اۋىلدىق ايماعىنىڭ اكىمى:
–ەسىك تە جابىق بولادى. ونىڭ ۇستىنە قاقپا دا جابىق تۇرادى. ماعان جۇمىسقا دا كەلمەگەن، اۋدانعا دا بارماعان. وزدەرىڭىزدەن بۇگىن عانا ءبىلىپ وتىرمىن. ونداي ادامدى كورمەدىك ءتىپتى.
اكىمنىڭ ۇستىنەن ۋچاسكەلىك پوليسەي مەن اۋداندىق پروكۋراتۋراعا ارىز جازىلىپ، دەنە جاراقاتتارى جايلى مەديسينالىق انىقتاما الىنعان. ءبىراق ءتارتىپ ساقشىلارىنىڭ وسى ۋاقىتقا دەيىن ەكىنشى تاراپتان تۇسىنىك الماعانى مەن اۋدانعا حابارلاماعانىن ەسكەرسەك، ءىس ساعىزشا سوزىلاتىن سىڭايلى.
