مولداۆيانىڭ سوسياليستەر پارتياسىنىڭ كوشباسشىسى يگور دودون ەل پرەزيدەنتىنىڭ تىكەلەي سايلاۋىندا جەڭىسكە جەتكەنىن جاريالادى، دەپ حابارلايدى قازاقپارات.

 «مەن بۇگىنگى سايلاۋدا جەڭىسكە جەتكەنىمىزدى نىق سەنىممەن ايتا الامىن. مۇحيتتىڭ ار جاعىندا داۋىس بەرۋ جالعاسىپ جاتىر. الايدا، ءبىزدىڭ وسى ۋاقىتتىڭ وزىندە 50 پايىز جانە پليۋس ءبىر داۋىس جيناعانىمىز بەلگىلى بولدى.

ءبىز جەڭدىك»،-دەدى ول بريفينگتە. دودون ءوزىنىڭ ەۋروپانى قولداۋشى وڭ كۇشتەردىڭ اتىنان سايلاۋعا تۇسكەن قارسىلاس كانديداتى مايە ساندۋدى ەلەكتوراتتى تىنىشتاندىرۋعا شاقىردى. «مەن ءسىزدىڭ جاقسى ءارى لايىقتى ناتيجە كورسەتكەنىڭىزبەن قۇتتىقتايمىن. الايدا، ءقازىر ءبىز قوعامنىڭ ەكىگە جارىلۋىنىڭ الدىن الۋىمىز كەرەك»،-دەدى سوسياليست. دودوننىڭ سوزىنشە، ول بۇكىل مولدوۆا حالقىنىڭ پرەزيدەنتى بولادى. ياعني وڭشىلداردىڭ دا، سولشىلداردىڭ دا، ءوزىنىڭ جاقتاستارى مەن قارسىلاستارىنىڭ دا. ساندۋ داۋىس بەرۋ ۋچاسكەلەرىن جابىلا سالىسىمەن وسى جولعى پرەزيدەنتتىك سايلاۋدىڭ ناشار ۇيىمداستىرىلعاندىعىن ايتقان. ونىڭ پىكىرىنشە، بيلىك وكىلدەرى ونىڭ شەت مەملەكەتتەردەگى سايلاۋ ۋچاسكەلەرى مەن داۋىس بەرۋ بيۋللەتەندەرىنىڭ سانىن ارتتىرۋ جونىندەگى تالابىن نازارعا المادى. ساندۋ ەلدىڭ سىرتقى ىستەر ءمينيستى مەن ورتالىق سايلاۋ كوميسسياسى باسشىسىنىڭ قىزمەتتەن كەتۋىن تالاپ ەتتى. سەبەبى لوندونداعى سايلاۋ ۋچاسكەلەرىنىڭ بىرىندە داۋىس بەرۋ بيۋللەتەندەرى ءبىتىپ قالعان. ياعني، رەسپۋبليكا ازاماتتارىنىڭ داۋىس بەرۋ قۇقىقتارى شەكتەلدى. مولداۆيانىڭ ورتالىق سايلاۋ كوميسسياسىنىڭ مالىمەتتەرىنشە، حاتتامالاردىڭ 98،32 پايىزى ەسەپتەلگەننەن كەيىن دودوننىڭ 54،24 پايىز، ال، ساندۋدىڭ 45،76 پايىز داۋىس جيناعاندىعى بەلگىلى بولدى، دەپ جازدى lenta.ru.