بيىل – تاۋەلسىزدىككە 25 جىل. شيرەك عاسىر تولىپ وتىرعان تاۋەلسىزدىك مەرەيتويى قوعام ءۇشىن زور ماڭىزعا يە. ءمانى مەن ماڭىزى ۇلكەن جاۋاپكەرشىلىك پەن ازاماتتىق پارىز جۇكتەپ وتىرعان تاۋەلسىزدىك تويىنا ونەر ۇجىمدارى دا ءوز ۇلەستەرىن قوسۋدا. بۇل تۋرالى «قامشى» پورتالى م.اۋەزوۆ تەاترىنىڭ باسپا ءسوز قىزمەتىنە سىلتەمە جاساپ حابارلايدى.

م.اۋەزوۆ تەاترى تاۋەلسىزدىكتىڭ 25 جىلدىعى اياسىندا ءبىرقاتار ءىس-شارالاردى ابىرويمەن وتكىزدى. سول ءىس-شارالاردىڭ ىشىندەگى شوقتىعى بيىك، يدەيالىق-مازمۇندىق تۇرعىدان مەملەكەتتىك ساياساتتىڭ جەمىسىن كورسەتىپ، ونى ودان ءارى ناسيحاتتاۋعا سەرپىن بەرىپ، قوعام بىرلىگىنىڭ نىعايا تۇسۋىنە ىقپال ەتكەن «اقتاستاعى احيكو» سپەكتاكلى.

تاۋەلسىزدىكتىڭ 25 جىلدىعى اياسىندا 91-ماۋسىم شىمىلدىعىن اشقان ءمادينا وماروۆانىڭ «اقتاستاعى احيكو» سپەكتاكلىنىڭ ءار قويىلىمى انشلاگپەن ءوتىپ، كورەرمەننىڭ جوعارعى باعاسىن الدى. سونىمەن قاتار، رەسپۋبليكالىق ب ا ق تا كەڭىنەن جازىلىپ، ءارتۇرلى پىكىرلەر مەن كوزقاراستاردىڭ تۋۋىنا سەبەپشى بولا وتىرىپ، ەل ىشىنە كەڭ تاراپ، جۇرتشىلىقتىڭ قىزىعۋشىلىعىن تۋعىزدى.

ەلىمىزدەگى «ءبىر حالىق – ءبىر ەل – ءبىر تاعدىر» - قوعامداعى بىرلىك پەن تاتۋلىقتى، تۇراقتىلىقتى نىعايۋتۋعا باعىتتالعان ساياساتتىڭ ساحناداعى ناقتى كورىنىسىندەي بولعان ايتۋلى سپەكتاكلدىڭ ومىرگە كەلۋى دە ەرەكشە. بۇل تۋرالى تەاتر ديرەكتورى ەرلان ءبىلال بىلاي دەپ ەسكە الادى.

«عابيت مۇسىرەپوۆ اتىنداعى قازاق مەملەكەتتىك بالالار مەن جاسوسپىرىمدەر تەاترىندا كوركەمدىك جەتەكشى بولىپ جۇمىس ىستەپ جۇرگەنىمدە تەاتر قاراعاندى قالاسىنا گاسترولدىك ساپارعا باردى. سول ساپاردا قازىرگى ءماجىلىس دەپۋتاتى نۇرلان دۋلاتبەكوۆكە جولىقتىم. ول كىسى اڭگىمە بارىسىندا ءبىر تاعدىرلى كىسى جايلى بىلەتىنىن الايدا ەڭ اۋەلى كارلاگ تۇرمەسىنىڭ ورنىنداعى مۋزەيگە بارىپ كورىپ كەلۋىمدى ءوتىندى. باردىم. كوردىم. مۋزەيدەن العان اسەرىم جانعا، ساناعا وتە اۋىر بولدى. نەشە كۇن سول كۇيدەن ايىعا الماي ءجۇردىم. سودان نۇرلان اعا احيكونىڭ تاعدىرلى ءومىر جولىن اڭگىمەلەپ بەردى. ءسويتىپ، احيكو تەسۋرونىڭ ءومىرىن ارقاۋ ەتكەن قويىلىم جاساۋدى ۇيعاردىق. م.اۋەزوۆ تەاترىنا باسشى بولىپ تاعايىندالعان سوڭ، تەاتر دراماتۋرگى ءمادينا وماروۆاعا ايتىپ، احيكونىڭ تاعدىرىنان پەسا جازۋىن ءوتىندىم. ءمادينا احيكو تەسۋرو تۇرىپ جاتقان اقتاس اۋىلىنا بارىپ، اقساقالمەن جولىعىپ، ءومىرىن ءوز اۋزىنان ەستىدى. وسىلايشا، «اقتاستاعى احيكو» پەساسى ومىرگە كەلدى. ال، شىعارمانى ساحناعا شىعارىپ، قويىلىم قويۋ ءۇشىن تالانتتى رەجيسسەر، «قارا شەكپەن»، «قوشتاسقىم كەلمەيدى...» سپەكتاكلدەرى ارقىلى كورەرمەن ىقىلاسىنا بولەنگەن اسحات ماەميروۆتى ارنايى شاقىرىپ، «اقتاستاعى احيكو» پەساسىن ساحنالاپ بەرۋدى وتىندىك.»

«اقتاستاعى احيكو» سپەكتاكلىنىڭ ساحناعا شىعىپ، كورەرمەنمەن قاۋىشۋىنا مادەنيەت جانە سپورت ءمينيسترى ارىستانبەك مۇحامەدي ۇلى زور ىقپال جاساپ، جان-جاقتى قولداۋ كورسەتتى. ءمينيستردىڭ ايرىقشا كوڭىل ءبولۋىنىڭ ناتيجەسىندە سپەكتاكل جوعارى دارەجەدە ساحنالاندى.

وسىلايشا، م.اۋەزوۆ تەاترى تاۋەلسىزدىكتىڭ 25 جىلدىعىنا ۇلكەن رۋحاني سىي تارتۋ ەتتى. قوعامدا ۇلكەن قىزىعۋشىلىق تۋدىرىپ، ءار قويىلىمى انشلاگپەن وتكەن دەرەكتى درامانىڭ باس كەيىپكەرى احيكو تەسۋرونىڭ تاعدىرىن قازاقستان پرەزيدەنتى ن.نازاربايەۆ جاپونياعا رەسمي ساپارى بارىسىندا جاپونيا پارلامەنتىندە سويلەگەن سوزىندە تىلگە تيەك ەتىپ، سول ارقىلى قازاقستانداعى تۇراقتىلىق پەن تاتۋلىقتى سىرت ەلدەرگە ۇلگى ەتتى. ءوز كەزەگىندە بۇل دا «اقتاستاعى احيكو» قويىلىمىنىڭ جەتىستىگى.

مىنە، ەندى احيكو تەسۋرونىڭ ساحنالىق بەينەسىمەن، تاعدىرىمەن ارقا جۇرتى قاۋىشپاق. تەاتردىڭ قاراعاندى جانە استانا قالالارىنا جاسالاتىن گاسترولدىك ساپارىندا «اقتاستاعى احيكو» قويىلىمىن 25 قاراشادا احيكونىڭ جەرلەستەرى، قاراعاندىلىقتار تاماشالاي الادى. ال، 29 قاراشادا «اقتاستاعى احيكو»  بەيبىتشىلىك جانە كەلىسىم سارايىندا استانا جۇرتىنىڭ نازارىنا ۇسىنىلادى.

تاۋەلسىزدىكتىڭ 25 جىلدىعىنا ارنالعان ەڭ ءىرى ونەر تارتۋى – «اقتاستاعى احيكو» سپەكتاكلىن كورۋگە اسىعىڭىزدار!