مادەنيەت جانە سپورت ءمينيسترى ارىستانبەك مۇحامەدي ۇلى "جىنىستىق بوپسالادى" دەپ ايىپتاعان ەڭلىك سىزدىقوۆانى سوتقا بەردى، - دەپ حابارلايدى «قامشى» پورتالى Tengrinews.kz-كە سىلتەمە جاساپ.

سوتتاعىلاردىڭ ايتۋىنشا، جوعارى لاۋازىمدى شەنەۋنىكتىڭ ءىسى وندىرىستە. مۇحامەدي ۇلى قىز ق ر قىلمىستىق كودەكسىنىڭ 130-بابى بويىنشا جاۋاپ بەرۋى ءتيىس دەپ ەسەپتەيدى. ناقتىراق ايتساق، بۇل باپ - جالا جابۋ، ياعني كوپشiلiك الدىندا نەمەسە بۇقارالىق اقپارات قۇرالدارىن نەمەسە تەلەكوممۋنيكاسيالار جەلىلەرىن پايدالانا وتىرىپ باسقا ادامنىڭ ابىرويى مەن قادىر-قاسيەتىنە نۇقسان كەلتىرەتىن نەمەسە ونىڭ بەدەلىن تۇسىرەتىن كورنەۋ جالعان مالىمەتتەر تاراتۋ. بۇل باپتىڭ جازاسى - ەكى مىڭ ايلىق ەسەپتىك كورسەتكىشكە دەيىنگى مولشەردە ايىپپۇل سالۋ نە سول مولشەردە تۇزەۋ جۇمىستارىنا نە ەكi جىلعا دەيىنگى مەرزىمگە باس بوستاندىعىن شەكتەۋ نە سول مەرزىمگە باس بوستاندىعىنان ايىرۋ.

ال الەۋمەتتىك جەلىلەردە سىدىقوۆانى قىلمىستىق جاۋاپكەرشىلىككە تارتۋ بويىنشا قۇجات تارالىپ جاتىر. مۇحامەدي ۇلىنىڭ بۇل شاعىمى استانانىڭ №2 ەسىل اۋداندىق سوتىندا قارالىپ جاتىر دەلىنەدى. 16 قاراشادا مۇحامەدي ۇلى مەن سىدىقوۆا ءىس ماتەريالدارىمەن تانىسۋ ءۇشىن جانە شاعىمنىڭ كوشىرمەسىن الۋ ءۇشىن، قۇقىقتارىن ءتۇسىندىرۋ ءۇشىن سوتقا كەلەدى.