وتكەن دەمالىستا، 12-13 قاراشا كۇندەرى اتىراۋدا كيوكۋشينكاي-كان كاراتەدەن بالالار، جاسوسپىرىمدەر، كادەتتەر، يۋنيورلار، ەرلەر جانە ايەلدەر اراسىندا قازاقستان رەسپۋبليكاسىنىڭ كۋبوگى ءوتتى. جارىستىڭ سالتاناتتى اشىلۋ ءراسىمى 13 قاراشادا “اتىراۋ” سپورتتىق-ساۋىقتىرۋ كەشەنىندە ءوتتى.
ءدۇبىرلى بايگەگە ەلىمىزدىڭ تۇكپىر-تۇكپىرىنەن كەلگەن سپورتشىلار قاتىستى. ناقتىراق ايتساق، كاراتەشىلەر استانا، الماتى قالالرىنان، اقمولا، اقتوبە، شقو، جامبىل، قاراعاندى، قىزىلوردا، ماڭعىستاۋ، وقو، سقو، اتىراۋ وبلىستارىنان ۇزىن سانى 350-گە جۋىق كاراتەشى بابىن سىنادى.
ال سايىستى تاماشالاۋعا اتىراۋ وبلىسىنىڭ اكىمى نۇرلان نوعايەۆ، ۇرككف پرەزيدەنتى، پارلامەنت ءماجىلىسىنىڭ دەپۋتاتى ومارحان وكسىكبايەۆ، مادەنيەت جانە سپورت مينيسترلىگىنىڭ سپورت جانە دەنە شىنىقتىرۋ كوميتەتىنىڭ ءتوراعاسى ەلسيار قاناعاتوۆ كەلدى.
جيىندا ءسوز العان اتىراۋ وبلىسىنىڭ اكىمى نۇرلان نوعايەۆ بارلىق قاتىسۋشىلارعا ساتتىلىك تىلەدى.
“ەلباسىمىز 25 جىل بويى سپورتتى دامىتۋعا ەرەكشە كوڭىل ءبولىپ كەلە جاتىر. پرەزيدەنتتىڭ تاپسىرماسىمەن ەلىمىزدىڭ بارلىق وڭىرىندە سپورتپەن اينالىسۋعا تولىق مۇمكىندىك جاسالدى. اتىراۋ وبلىسى دا بۇل ۇردىستەن شەت قالعان جوق. ايماقتا بارلىق كەرەك-جاراقپەن قامتاماسىز ەتىلگەن سپورت سارايلارى بوي كوتەرىپ، حالىقتىڭ يگىلىگىنە بەرىلىپ جاتىر. بۇگىنگى سايىس ەلباسىمىزدىڭ سول قامقورلىعىنىڭ كورىنىسى. سايىسقا قاتىسۋشىلارعا ساتتىلىك تىلەيمىن! ۇمىتتەرىڭىز اقتالسىن!”، - دەدى وبلىس اكىمى.
جارىس قورىتىندىسى بويىنشا، ايەلدەر اراسىندا اتىراۋلىق كريستينا ساينوۆا مەن اقمولالىق الەمگۇل سابىرحان ۇزدىك دەپ تانىلدى. ەرلەر اراسىندا اتىراۋلىق اندرەي كوتوۆ، استانالىق جانىبەك بۇرحاشبايەۆ، دانيار ءاليمۋسينوۆ جانە نۇرلىحان سادۋاقاسوۆتار جەڭىستى قانجىعالارىنا بايلادى.
پىكىر قالدىرۋ