جەمقورلىققا قارسى ءىس-قيمىل جونىندەگى ۇلتتىق بيۋرو Central Asia Monitor جانە Radiotochka.kz باسىلىمدارىنىڭ باس رەداكتورى بيگەلدى عابدۋللينگە قاتىستى سوتقا دەيىنگى تەرگەۋدى باستادى، - دەپ حابارلايدى Qamshy.kz ۇلتتىق بيۋرو باسپا ءسوز قىزمەتىنە ىلتەمە جاساپ.

ءقازىر بيگەلدى عابدۋللين ۇستالىپ، استانا قالاسى ءىىد-نىڭ ۋاقىتشا ۇستاۋ يزولياتورىنا قامالعان.

قىلمىستىق قۋدالاۋ ورگانى ءعابدۋلليندى وزىنە باعىنىشتى اقپارات قۇرالدارىندا «مەملەكەتتىك ورگان باسشىلارىنا قاتىستى ولاردىڭ ىسكەرلىك بەدەلىن تۇسىرەتىن جاعىمسىز ماتەريالداردى جاريالاۋ ارقىلى اقپاراتتىق شابۋىلداردى ۇدەتىپ، سىندى دوعارۋ ءۇشىن لاۋازىمدى تۇلعالاردان ءوز مەديارەسۋرستارىنا مەملەكەتتىك تاپسىرىس الىپ كەلگەن» دەگەن مالىمەت تاراتتى.

ۆەدومستۆو سونداي-اق، كەيبىر شەنەۋنىكتەردىڭ ءعابدۋلليننىڭ مۇددەسىن جۇزەگە اسىرۋعا، مەملەكەتتىك تاپسىرىس تۋرالى كەلىسىمدەرگە قول قويۋعا ىقپال ەتكەنىن مالىمدەدى.

«سودان كەيىن (مەملەكەتتىك تاپسىرىم تۋرالى كەلىسىمنەن – رەد.) عانا ولاردىڭ قىزمەتى تۋرالى جاعىمدى ماتەريالدار جاريالانعان. ماسەلەن، جامبىل وبلىستىق اكىمدىگىنەن ول 10 ميلليون تەڭگە كولەمىندەگى بيۋدجەت قارجىسىن بوپسالاعان. وسىنداي جولمەن عابدۋللينگە تاعى جەتى مەملەكەتتىك ورگان اقشا اۋدارعان»، - دەلىنگەن حابارلامادا.

ەستەرىڭىزگە سالساق، بۇعان دەيىن سالىق تولەۋدەن جالتاردى، الاياقتىق جاسادى دەگەن ايىپپەن قازاقستان جۋرناليستەر وداعىنىڭ ءتوراعاسى سەيىتقازى ماتايەۆ پەن ونىڭ ۇلى، «قازتاگ» حاا باسشىسى اسەت ماتايەۆ قۋعىندالىپ، س. ماتايەۆ التى، ءا. ماتايەۆ بەس جىلعا باس بوستاندىعىنان ايرىلعان بولاتىن.