Twitter-دە «مۋسليم» دەگەن اتپەن تىركەلگەن بەلگىسىز بىرەۋ قىرعىز پرەزيدەنتى اتامبايەۆقا ولىممەن قورقىتۋ ارقىلى بوپسا جاسادى. بۇل تۋرالى اكيpress-كە سىلتەمە جاساپ «قامشى» پورتالى حابارلايدى. بۇل جايت بويىنشا قىرعىزدىڭ ۇلتتىق قاۋىپسىزدىك كوميتەتى تەكسەرىس جۇرگىزىپ جاتىر.  

Twitter قولدانۋشىسى ءوزىنىڭ اتامبايەۆقا باعىتتاعان ءقاۋىپ توندىرەتىن حابارلاماسىن بۇگىن جازعان بولاتىن. حابارلاما مازمۇنى مىنانداي: «مەن قىرعىزستانعا، وزبەكستان مەن تاجىكستانعا، قازاقستانعا ءۇن قاتامىن: سىزدەردەي يتتەردى مۇسىلماندار ولتىرەدى، اللا جازالايدى (اۆتور ءستيلى ساقتالعان. -رەد.)». ۇركىتىپ-قورقىتۋشى «مۋسليم» سونداي-اق قىرعىزستان پرەزيدەنتىنە دە تىكەلەي حابارلاما جولداپتى. انىعىن ايتساق، ول «مەن اتامبايەۆتى ولتىرەمىن. اتاپ وتكەن باسقا مەملەكەتتەردە دە جاقىندا بولامىن» دەيدى.

اككاۋنت Twitter-دە 2016 جىلدىڭ قاراشا ايىندا عانا تىركەلگەن. ول ورنالاسقان جەرى رەتىندە سيريانى كورسەتكەن. العاشقى جازباسى بولسا 12 قاراشادا جاريالانعان. ونىڭ جازعان بارلىعى 6 ءتۆيتى دە ورىس تىلىندە جازىلعان. ول ءوزىنىڭ پاراقشاسىنا دايش سيمۆولدارىن قويعان.