الماتى وبلىسىندا ءوز بالاسىن دارەتحاناعا تاستاعان اناعا ۇكىم شىعارىلدى. 24 جاستاعى التىناي اقجولتايەۆا جۇكتىلىگىن تۋىستارىنان جاسىرىپ جۇرگەن، ال تولعاق باستالعاندا دالاداعى دارەتحاناعا بەت العان. قىز ءوز ايىبىن مويىنداپ، وكىنىش ءبىلدىردى، ءبىراق جاۋاپكەرشىلىكتەن بوساتىلمادى، دەپ حابارلايدى كتك.

- كەشىرىم وتىنەمىن، بۇلاي بولادى دەپ مۇلدەم ويلامادىم. مەن ونى دارەتحاناعا تاستاعىم كەلگەن جوق. ءوز قىزىمدى تاربيەلەگىم كەلەدى. مەن ايىپتىمىن، كەشىرىڭىزدەر مەنى. قىزىمدى ءوز قولىما العىم كەلەدى، - دەدى التىناي اقجولتايەۆا. سوت قىزدىڭ وكىنگەنىن ەسكەرە وتىرىپ، ءبىر جارىم جىلعا باس بوستاندىعىنان ايىردى. تاستاندى ءسابي تۋرالى تەرگەۋ جۇمىستارى ءتورت ايعا سوزىلدى. العاشىندا ا.اقجولتايەۆا كەپىل ارقىلى بوساتىلدى، كەيىن قايتادان قاماۋعا الىندى. وقيعا شىلدە ايىندا بولعان ەدى. اقشي اۋىلىنىڭ تۇرعىنى ءوز دارەتحاناسىنان ءسابي تاۋىپ الدى. انىقتالا كەلە، تاستاندى ءسابيدىڭ اناسى تۇرعىننىڭ ءوز نەمەرەسى بولىپ شىقتى. ولار جاڭا تۋعان ءسابيدىڭ جىلاعان داۋىسىن ەستىگەن. دارىگەرلەر نارەستەنىڭ ءتىرى قالۋىن تاڭعالارلىق وقيعا دەپ باعالادى. ءقازىر كىشكەنتاي قارلىعاش بوبەكتەر ۇيىندە تۇرىپ جاتىر. ونىڭ الداعى تاعدىرىن قامقورشىلىق ورگاندارى شەشەدى. ونى تۋعان اجەسى ءوز تاربيەسىنە العىسى كەلەدى.