«ەكسپو»-دا قيراپ قالعان  كوپىرگە قاتىستى دەرەك بويىنشا   قىلمىستىق ءىس قوزعالدى. ىشكى ىستەر مينيسترلىگى قۇرىلىس اۋماعىنداعى اپات بولعان جەردى ءجىتى تەكسەرىپ جاتىر.

بۇل تۋرالى كتك ارناسى حابارلايدى.

قالمۇحانبەت قاسىموۆ، ق ر ىشكى ىستەر ءمينيسترى:

ء-قازىر تەحنيكالىق ساراپتاما جۇرگىزىپ جاتىرمىز. سەبەبىن انىقتايىق، كەيىن شەشىم شىعارامىز. بىرەۋ قاساقانا كەسىپ تاستاعان شىعار.  نەمەسە قۇرىلىس ماتەريالى ساپاسىز بولۋى مۇمكىن. بارلىعىن انىقتايمىز.

استاناداعى حالىقارالىق كورمە وتەتىن اۋماقتاعى اسەمدىك ءۇشىن سالىنعان 90 مەترلىك كوپىر وپىرىلىپ قالعان ەدى. وتكەل تۋرا قازاقستانعا تيەسىلى ۇلتتىق  نىسان مەن شەتەلدىكتەرگە ارنالعان پاۆيلوندى بايلانىستىرىپ تۇرعان. «ەكسپو» ايماعىنداعى اپات تۇسكى ۋاقىتتا بولعاندىقتان ادام شىعىنى جوق. كوپىردى سالعان "BI Group" وقىس وقيعاعا قاتىستى بىرنەشە بولجام جاسادى. قۇرىلىس كومپانياسى باسشىسىنىڭ ايتۋىنشا، نىساندى جوبالاعاندا قاتە كەتكەن، قۇرىلىس تالاپتارى بۇزىلعان نەمەسە ماتەريال ساپاسىز بولۋى مۇمكىن. قالاي بولعاندا دا، كەلگەن  شىعىندى "BI Group" ءوزى وتەيدى.