الماتى قالاسىنىڭ اكىمى باۋىرجان بايبەك «اۆتو الما ترانس» اۆتوبۋس پاركىنىڭ قۇرىلتايشىلارى مەن باسشىلارىنا اۆتوپاركتىڭ تەحنيكالىق احۋالىنىڭ ناشارلىعىنا  بايلانىستى سوگىس بەردى، دەپ حابارلايدى «قازاقپارات». 

«بيۋدجەتتەن قوسىمشا 15 ميلليوندى الاسىزدار. (...) 65ء-شى مارشرۋتتى قاراڭىز، كىم وسىنداي اۆتوبۋسقا مىنەدى؟ سىزدەردىڭ بيلەتتەرىڭىز «وڭاي» تەرمينالىنىڭ جانىندا ساتىلۋدا، ارينە، ادامدار مۇنداي اۆتوبۋسقا اقشا تولەمەيدى. نارىقتا جۇرگەندەرىڭىزگە قانشا جىل بولدى؟ 20 جىلدىڭ ىشىندە وسى ءۇشىن ۇيالمادىڭىزدار ما؟ قانە، سىزدەردىڭ اۆتوبۋستارىڭىزبەن قالانى ارالايىق. 65ء-شى مارشرۋت، ءبىر تەرمينال جوق، توبەسى شۇرق تەسىك. بۇل الماتىدا! توبەسى شۇرق تەسىك! مەن سىزدەردىڭ ورىندارىڭىزدا وسىنداي بيزنەستى جاۋىپ تاستار ەدىم، ۇياتقا قالماس ءۇشىن»، - دەگەن باۋىرجان بايبەك اۆتوپارك باسشىلىعى مەن قۇرىلتايشىلارىنا سوگىس بەردى.

قالا باسشىسى مۇنىمەن توقتامادى. ول اۆتوبۋس توبەسىندەگى كومكەرمەلەر احۋالىنىڭ ناشارلاعانى، جارىقتاندىرۋ پلافونىنىڭ جوقتىعى، ەدەن جابىنىنىڭ جىرتىقتىعى، جارىقتىڭ تۇسپەۋى تۋرالى ءسوز قوزعادى.

«سىزدەردى قالا تۇگىلى، وبلىسقا كىرگىزبەۋ كەرەك. تۇتقا سىنىپ قالعان، ەدەن جابىنى تالاپقا ساي ەمەس، بيلەتتەردى قايتالاپ ساتاسىزدار، جولاۋشىلار ورىندىعى بەكىتىلمەگەن. سىزدەر قالادان بىردەڭە دامەتەسىزدەر. ءبىرىنشى وزدەرىڭىز ۇلەس قوسۋ كەرەكسىزدەر»، - دەپ جالعاستىردى اكىم. اكىم جاعدايدى تۇزەتۋ ءۇشىن اۆتوپارك باسشىلىعىنا ەكى اپتا ۋاقىت بەردى. جۇرگىزۋشىلەردىڭ ەڭبەك اقىسىن دا نازاردان تىس قالدىرمادى.

«سىزدەردىڭ جۇرگىزۋشىلەرىڭىز جەتپىس مىڭ تەڭگەگە جۇمىس جاسايتىن، قايدان ءوزى، مارستان با؟ Greenbus جۇرگىزۋشىلەرىنىڭ ورتاشا جالاقىسى 115 مىڭ، ال سىزدەردە - 70 مىڭ. بارلىق جۇرگىزۋشىلەر بىردەي، ولار بىر-بىرىمەن ارالاسادى. ولاردىڭ وتباسى، بالالارى بار... جالاقىلارىن كوتەرىڭىزدەر، شەشىڭىزدەر. ساپاسىنا ءمان بەرىڭىزدەر»، - دەدى اكىم اۆتوپارك وكىلدەرىنە.

ءوز كەزەگىندە اۆتوپاركتىڭ اتقارۋشى ديرەكتورى ازات احلاسوۆ بۇل سالادا جاعدايدىڭ كۇردەلەنىپ، قوسالقى بولشەكتەردىڭ 50% قىمباتتاپ، كوممۋنالدىق تولەمنىڭ قىمباتتاپ، 4 گەكتارلىق جەر تولەمىنىڭ ءوسىپ جاتقانىن تىلگە تيەك ەتتى. اۆتوپاركتە جالپى 692 قىزمەتكەر جۇمىس جاسايدى. «ءبىز قارجىلىق جاعىنان قولداۋ تانىتۋلارىڭىزدى سۇراپ ەدىك. بۇل ايدا 33 ميلليون تەڭگە ءبولىندى. اقشا قوسالقى بولشەك ساتىپ الۋعا كەتەدى، اۆتوپارك حالىققا 90% قىزمەت كورسەتۋ ءۇشىن 650 اۆتوشينا، 380 اككۋمۋلياتور ساتىپ الۋ كەرەك»، - دەدى ول.