كەشە، 18 قاراشا كۇنى الماتىداعى ءو.جولداسبەكوۆ اتىنداعى ستۋدەنتتەر سارايىندا "قامشى" پورتالىنىڭ ۇيىمداستىرۋىمەن "كوش جانە كوشباسشى" اتتى مەرەكەلىك كونسەرت ءوتتى. مەرەكەلىك كەشكە "قازاقستان" ۇلتتىق ارناسى اقپاراتتىق قولداۋ كورسەتتى. الماتى قالاسىنىڭ تۇرعىندارىنا ستۋدەنتتەر سارايىنىڭ ەسىگى سول كۇنى ايقارا اشىق بولدى. تەگىن بيلەت الامىن دەۋشىلەر بار بولعانى ەرەجەگە ساي الدىن-الا سايتىمىزعا كىرىپ، تىركەلۋى قاجەت ەدى.  

مىڭنان استام كورەرمەن جيناعان "كوش جانە كوشباسشى" كونسەرتى رۋحاني شولدەپ جۇرگەن قازاققا ءمولدىر بۇلاق بولدى. كەش بارىسىندا ءداستۇرلى ءان-جىر، قوڭىر كۇي، ەڭسەنى كوتەرىپ، رۋحتى جانيتىن پاتريوتتىق تۋىندىلار ورىندالدى. كونسەرتتە ونەر كورسەتكەن بارلىق ونەرپاز ۇلتتىق مۇددەنى جوعارى قوياتىن ازاماتتار ەكەندىگىن ەرەكشە اتاپ وتكەن ءجون. ءبىر ءان ورىنداۋعا شىققان الەمدىك دەڭگەيدەگى قازاقتىڭ جەزتاڭداي ءانشىسى مايرا مۇحاممەدتى حالىق ساحنادان جىبەرگىسى كەلمەدى. قالىڭ قازاقتىڭ كوڭىلىن قيماعان مايرا "اعاجاي، التايداي جەر قايدا-ايمەن" قوسا "بۇلدىرگەندى" شىرقاپ بەردى. 

كەش شىمىلدىعىن قۇرمەتتى قوناعىمىز ق ر اقپارات جانە كوممۋنيكاسيا ءمينيسترى داۋرەن ابايەۆ اشتى. حالىق الدىندا ءسوز سويلەگەن مينيستر وسى كۇندى تويلاپ وتىرۋىمىز تاۋەلسىزدىگىمىزدىڭ ارقاسى دەدى.

داۋرەن ابايەۆ: وسىنىڭ ءبارى ساناۋلى كۇندەردەن كەيىن 25 جىلدىعىن اتاپ وتكەلى وتىرعان تاۋەلسىزدىگىمىزدىڭ جەتىستىگى. 25 جىل بويى قوعامدا بىرلىك پەن كەلىسىمدى، تۇراقتى دامۋدى ورنىقتىرعان، ق ر حالقىن ءبىرتۇتاس ۇلتقا اينالدىرعان ەلباسىنىڭ جەمىسى.  

سونداي-اق، "قازاقستان" تەلەراديوكورپوراسياسىنىڭ ءتوراعاسى كەمەلبەك ويشىبايەۆ، ق ر ءبىلىم جانە عىلىم ءمينيسترىنىڭ كەڭەسشىسى راۋان سىدىقوۆ، ق ر ءسىم الماتى قالاسىنداعى وكىلدىگىنىڭ باسشىسى ارسلان داندىبايەۆ، اقىن قازىبەك يسا، ق ر "نۇر وتان" پارتياسىنىڭ الماتى قالالىق فيليالىنىڭ  اتىنان كەلگەن قالامگەر قايىپمۇنار تابەي، ق ر مادەنيەت جانە سپورت مينيسترلىگىنىڭ اتىنان كەلگەن جۋرناليست مەلدەش عالىمجان، "اسىل ارنا" رۋحاني-اعارتۋشىلىق ارناسىنىڭ ديرەكتورى مۇحامەدجان تازابەكوۆ، بەلگىلى جۋرناليستەر سەرىك اباس-شاھ، ارمان سقابىل ۇلى، سەرىك ابىكەن ۇلى، سەرىك جانبولات كەشتىڭ سىيلى قوناقتارى بولدى. "كوش جانە كوشباسشى" كونسەرتىنىڭ وتكىزىلۋ سەبەبىنىڭ تەرەڭ ماعىناسىن تۇسىنگەن ق ر پرەمەر-مينيسترىنىڭ ورىنباسارى، اۋىل شارۋاشىلىق ءمينيسترى اسقار مىرزابەكوۆ ءوز قۇتتىقتاۋ حاتىن جىبەردى. باتىس قازاقستان، اقمولا وبلىسى، جامبىل وبلىسى اكىمدەرى اتىنان كەلگەن وكىلدەر دە كەش قوناعى بولىپ قانا قويماي، وزدەرىمەن بىرگە ءبۇتىن ءبىر وبلىستىڭ قۇتتىقتاۋ-سالەمىن جەتكىزدى. 

كوپشىلىكتىڭ اراسىنان ارنايى شاقىرتۋ الماسا دا بوي كورسەتكەن زيالى قاۋىم كوپ بولدى. قازاقتىق مۇددەنى جوعارى قويعان رەسپۋبليكالىق تەلە-باسىلىمداردىڭ تىلشى-جۋرناليستەرىن دە قاراپايىم كورەرمەن قاتارىنان بايقاپ قالدىق.  

ساۋلە ابەدينوۆا، جۋرناليست:  بۇگىنگى كەش وتە تاماشا ءوتتى. مەن كىرەمىن دە شىعامىن دەپ كەلگەن ەدىم. ءبىراق، مىنا كەشتى قيماي، اياعىنا دەيىن قالىپ قالدىم. ءداستۇرلى، تازا، جاندى داۋىستاعى اندەردى ەستىپ ءبىر راحاتتاندىم. ۇيىمداستىرۋشىلارعا العىسىم شەكسىز!

ءاربىر ءۇشىنشى قازاق شەتەلدە ءومىر ءسۇرىپ ءجۇر دەگەن مالىمەت بار. 25 جىلدا تاعدىر تەزىمەن شەكارا اسىپ كەتكەن كوپ قازاقتىڭ ميلليونى ەلىمىزگە ورالىپتى. بۇل ويلانۋعا دا تويلاۋعا-قۋانۋعا دا سەبەپ. قامشىگەرلەر قازاق كوشى توقتامايتىنىنا سەنەدى.