كەيبىر مەملەكەتتەردە بەلگىلى ءبىر شەنەۋنىكتىڭ قول استىندا قىزمەت ىستەيتىن جاس كەلىنشەككە نەمەسە بويجەتكەنگە قىرىنداعانى تۋرالى اقپاراتتار اندا-ساندا قىلاڭ بەرەتىنى راس. كەيبىرەۋلەر ءوزىنىڭ بەيادەپ ءجۇرىسىن مويىنداسا، وزگەلەرى لاۋازىمىنا سەنىپ، مويىنداماۋعا تىرىسادى. الەمدەگى الىپ مەملەكەتتىڭ ءبىرى دەموكراتيالىق اقش-تا ايەلدەرمەن بايلانىسى كوپشىلىككە جاريا بولعاننان كەيىن ءوز ەركىمەن قىزمەتتەن كەتكەن جوعارى لاۋازىمدى شەنەۋنىكتەر كىمدەر؟ ەندى سوعان توقتالايىق.

وڭتۇستىك كارولينا گۋبەرناتورى  مارك سانفورد 2009 جىلدىڭ 24 ماۋسىمىندا كوڭىلدەسىمەن كەزدەسۋ ءۇشىن ارگەنتيناعا بارعانىن جەتى كۇن وتكەندە مويىنداپتى. ءوزىنىڭ 4 بالاسى بولا تۇرا ارگەنتيناداعى جاس كەلىنشەكپەن سەگىز جىل بويى كەزدەسىپ ءجۇرىپتى. "مەنىڭ بۇل ءىسىم دۇرىس ەمەس" دەپ مالىمدەدى ول كوپشىلىككە.

2009 جىلى 19 ماۋسىمدا دجون ەنساين دەگەن سەناتور ءوزىنىڭ كومەكشىسى بولىپ تابىلاتىن شەنەۋنىك ايەلمەن بايلانىسى بار ەكەنىن  كوپشىلىككە جاريا ەتكەن. ول بۇل ارەكەتكە كوڭىلدەسىنىڭ كۇيەۋى وعان قوقان-لوقى كورسەتكەن سوڭ بارعان ەكەن.

نيۋ-يورك شتاتىنىڭ گۋبەرناتورى ەليوت سپيتسەر 2008 جىلى جەزوكشەلەرگە بارعانىن جاريالاپ، قىزمەتىنەن كەتكەن. ونىڭ جەڭىل جۇرىستىلەرمەن بايلانىسى تۋرالى «New York Times» باسىلىمىندا ماقالا جاريالانعان. گۋبەرناتور ماقالا جارىققا شىققان  اپتادا سوزگە كەلمەستەن ورنىن بوساتقان.

سەناتور ديەۆيد ۆيتتەر دە 2007 جىلى جەزوكشەلەر ۇيىنە تەلەفون شالعانىن مويىنداعان. «Hustler» جۋرنالىنىڭ جۋرناليستەرى سەناتوردىڭ تەلەفون ءنومىرى جەزوكشەلەر ۇياشىعىمەن بايلانىستى ەكەنىن جازدى.

بوب ليۆينگستون دەگەن شەنەۋنىك 1998 جىلى پارلامەنت سپيكەرى بولايىن دەپ تۇرعان جەرىنەن  ايەلى وعان كۇدىكپەن قارايتىنىن ايتادى. سودان ەكى اي وتپەي جاتىپ،  شەنەۋنىك كونگرەستەگى قىزمەتىن تاستايدى.

اقش پرەزيدەنتى بولعان بيلل كلينتونگە  دە مونيكا ليەۆينسكيمەن بايلانىسى ءۇشىن حالىق سەنىمسىزدىك تانىتقان.

سەناتور بوب پەكۆۋد 1995 جىلى وتستاۆكاعا كەتتى. ويتكەنى ول قاراماعىنداعى  17 قىز-كەلىنشەككە قىرىنداعان. ونىڭ ايەلقۇمارلىعى تۋرالى اقپاراتتار كوپشىلىككە كەڭىنەن جاريا بولعان.

ازىرلەگەن ايعانىم ءبىرتۋار