«تاۋەلسىزدىكتىڭ ءدامىن ءار تۇرعىن سەزىنۋ كەرەك» دەگەن اقتوبە وبلىسىنىڭ اكىمى بەردىبەك ساپاربايەۆ وبلىس دەڭگەيىندە ۇلكەن قايىرىمدىلىق شاراسىن ۇيىمداستىردى. ەل تاۋەلسىزدىگىنىڭ 25 جىلدىعىنا ارنالعان «مەنىڭ ەلىم – ماڭگىلىك ەل!» ەل اكسياسى مۇقتاج جاندارعا كومەك كورسەتۋگە ۇندەدى.بۇل تۋرالى NUR.KZ جاڭالىقتارى جازدى.
باقىتگۇل قالييەۆا. فوتو: NUR.KZ
وبلىس اكىمى قايرىمدىلىق شاراسىندا تەك قاتىسۋشى بولىپ جۇرگەن اقتوبەلىك شەنەۋنىكتەرگە ەسكەرتۋ جاسادى. قايىرىمدىلىق جاشىكتەرىندە جاتقان تيىندارعا كوڭىلى تولماي قاراعان اكىم:
«بۇل جەرگە باسشىلار باستاپ سالۋ كەرەك ەمەس پە؟»،- دەپ ءاربىر جاشىككە 10 مىڭ تەڭگەدەن سالىپ كەتتى. «جۇرەكتەن جۇرەككە» دەپ قايىرىمدى ىسكە ۇندەگەن قورجىندارعا وبلىس اكىمىنىڭ ەسكەرتۋىنەن كەيىن عانا قوماقتى قارجىلار تۇسە باستادى.
مەكتەپ وقۋشىلارىنىڭ قول ونەر بۇيىمدارى از اقشاعا باعالانىپ، تۇسكەن قارجى كومەك كورسەتۋگە جولداندى. وسىعان دەيىن مەكتەپ ديرەكتورلارى از قامتىلعان وتباسى بالالارىنا جىلى كيىمدەر ۇلەستىرگەن بولاتىن.
شاراعا وبلىستاعى كومەككە مۇقتاج جاندار شاقىرىلىپ، سەرتيفيكاتتار تابىستالدى. وبلىس اكىمى جەتىم بالالار ۇيىندە تاربيەلەنگەن مەملەكەتتىك قىزمەتكەرگە 2 بولمەلى پاتەردىڭ كىلتىن بەردى.
«مەن بالالار ۇيىنە 5 جاسىمدا كەلدىم. كەيىن وبلىستىق جاسوسپىرىمدەر ۇيىندە تۇردىم. 11-سىنىپتى بىتىرگەننەن كەيىن زاڭ كوللەدجىنە وقۋعا ءتۇستىم. جۇمىسقا كىرىپ، باسپانا الۋ ءۇشىن اقشا جينادىم. وبلىس اكىمى ءۇي الۋعا جەتپەگەن 1 ميلليون 500 مىڭ تەڭگەنى ەسەپشوتىما اۋدارىپ، 2 بولمەلى باسپانا تابىس ەتىپ وتىر. قاسىمدا ءمۇعالىم بولىپ ىستەيتىن اپكەم مەن ستۋدەنت ءسىڭىلىم بار. ەندى ءبىز بىرگە تۇراتىن بولامىز»،- دەيدى باقىتگۇل قالييەۆا.
باقىتگۇل وبلىستىق مامانداندىرىلعان سوتتا كەڭسە قىزمەتكەرى بولىپ ەڭبەك ەتەدى.
«25 جىلدىقتى ەلىمىزدىڭ ءاربىر ازاماتى سەزىنۋ كەرەك. اسىرەسە، قامقورلىقتى قاجەت ەتەتىن كىسىلەرگە قولداۋ كورسەتۋگە ءتيىسپىز. ارامىزدا مىڭنان اساتىن جارىمجان بالالار بار. 2 مىڭنان اساتىن جەتىم بالالار بار. 7 مىڭعا جۋىق ناشار تۇراتىن وتباسىلار بار. ءبىز ولاردىڭ بارىنە كومەكتەسەمىز. جىل سوڭىنا دەيىن مۇقتاجدىقتى قاجەت ەتەتىن بىردە ءبىر وتباسىن كومەكسىز قالدىرمايمىز. مەن بارلىق اقتوبەلىكتەردى وسى اكسيانى قولداۋعا شاقىرامىن»، - دەدى وبلىس اكىمى.
"ادام ومىردە العىس الىپ ءجۇرۋ كەرەك. العىس العان ادام جامان بولمايدى. مۇنداي شارالار تەك اقتوبەدە عانا ەمەس، قازاقستاندا جالعاسىن تابادى دەپ ويلايمىن. قازاقستاننىڭ ءاربىر ازاماتى قامقورلىقتى سەزىنۋ كەرەك. مىنە، سوندا ءبىزدىڭ دامىعانىمىز"، -دەدى بەردىبەك ساپاربايەۆ.
شارا كەزىندە قارجىدان قىسىلىپ، ۇيىنە گاز كىرگىزە الماي وتىرعان اۋىل تۇرعىندارىنا دا كومەك كورسەتىلدى.
