مەملەكەتتىڭ اقشاسىن تالان-تاراجعا سالعانى ءۇشىن سەگىز جىلعا سوتتالعان ەكس-پرەمەر سەرىك احمەتوۆ ۇكىمەتكە 150 ميلليون تەڭگە قايتارۋدان باس تارتىپ وتىر. بۇرىنعى شەنەۋنىك پەن اتى شۋلى ىسكە قاتىسى بار تاعى ءتورت ادامنان قوماقتى سوما ءوندىرىلسىن دەگەن سوت شەشىمى وسىدان ءبىر اي بۇرىن شىققان ەدى.
بۇل تۋرالى 31 ارنا حابارلايدى.
ەكس-پرەمەر سەرىك احمەتوۆ ىسىنە قاتىستى بەس سوتتالۋشىدان ماتەريالدىق شىعىن وتەۋدى تالاپ ەتكەن قاراعاندى قالاسىنىڭ اكىمى نۇرلان اۋباكىروۆتىڭ ارىزىن سوت القاسى جارتىلاي عانا قاناعاتتاندىرىپتى. سەرىك احمەتوۆ پەن باۋىرجان ابدىشيەۆ باستاعان ەكس-شەنەۋنىكتەر ۇكىمەت قازىناسىنا 148 ميلليوننان استام اقشا قايتارۋى ءتيىس بولعان. دەگەنمەن سوتتالعانداردىڭ ءوزى شەشىممەن كەلىسپەي، اپپەللياسيالىق شاعىم ءتۇسىردى. ەندى ءۇش بىردەي ارىز قاراعاندى وبلىستىق سوتىندا قارالماق.
