وتىن-سۋ الۋعا اقشاسى جوق قىزىلوردا وبلىسىنىڭ تۇرعىنى قارا سۋىقتان قورعانۋدىڭ تىڭ ءتاسىلىن تاپتى. جوسالى كەنتىندە تۇراتىن سەرىكباي احمەتوۆ قىستا قاتىپ قالماۋ ءۇشىن جەرتولەگە جاسىرىنباقشى. سەبەبى، 70 جاستاعى قاريانىڭ ءۇيىن جىلىتاتىن وتىن-كومىرى جوق. سوندىقتان باسپاناسىنىڭ ىشىنەن جەر قازىپ، قىس بويى سول جەردە كۇنەلتپەكشى.

بۇل تۋرالى كتك ارناسى حابارلايدى.

قارا سۋىقتا قاتىپ قالماۋدىڭ قامىنا كىرىسكەن قاريا ءبىر اپتادان بەرى ءۇي ىشىنەن جەرتولە قازىپ جاتىر. ويتكەنى سەرىكباي احمەتوۆتىڭ قىستا جاعاتىن وتىنى جوق. جالعىزباستى اقساقال الاتىن زەينەتاقىم ازىق-تۇلىكتەن ارتىلمايدى دەيدى. سوندىقتان ەكىنشى توپتاعى مۇگەدەك ۇسكىرىك ايازدا جەر استىنا تىعىلىپ جان ساقتاماقشى.

سەرىكباي احمەتوۆ، جوسالى كەنتىنىڭ تۇرعىنى:

-جاعاتىن ەشتەڭەم جوق. جەردىڭ استىنا كىرىپ  جىلى جەردە، جەردىڭ استىندا ءومىر سۇرەمىن. نە ىستەيمىن ەندى؟

ءقازىر قاريا جەرتولەنىڭ جارتىسىن قازىپ قويىپتى. الايدا قىستا جىلى جاتۋ ءۇشىن ءالى دە تەرەڭدەتۋ كەرەك دەيدى.   

سەرىكباي احمەتوۆ، جوسالى كەنتىنىڭ تۇرعىنى: 

-ەكى مەتر قازام. بويىم 1،68سم. سوسىن استىنا جامان كورپەلەرىم بار سونى توسەپ، ۇستىمە جامان كورپەلەردى جامىلىپ جاتامىن.

تۋعان-تۋىسى دا بالا-شاعاسى دا جوق قاريا تەك كورشىلەرىمەن ارالاسادى ەكەن. ولار دا سەرىكباي احمەتوۆتىڭ بۇل قادامعا امالسىزدان بارىپ وتىرعانىن ايتادى.

راحيما وراقوۆا، جوسالى كەنتىنىڭ تۇرعىنى

-اندا-ساندا كەلىپ كەتەدى. مىنا ۇيدەن سۋ الىپ كەتەدى. ەشقانداي جاماندىعىن كورگەن جوقپىز .

جەر استىنان جىلىلىق ىزدەگەن اقساقال اتقامىنەرلەردىڭ دە الدىنا تالاي بارعان ەكەن. الايدا ەشكىم كومەك قولىن سوزباپتى. سوندىقتان بىلتىرعى قىستا ءۇيىنىڭ ەدەندەرىن وتقا جاعىپ امان شىققان.