بىزدەردىڭ بىلەتىنىمىزدەن بىلمەيتىنىمىز كوپ. سول سەبەپتى جارتىكەش بىلگەنىمىزبەن جەر-الەمدى جارىپ كەتەردەي داۋرىعاتىنىمىزدى قايتەرسىڭ؟! ماسەلەن، باۋىرجان مومىش ۇلى مەن فيدەل كاسترو قارىم-قاتىناسى جايلى كوپ ايتىلىپ-جازىلادى.
الايدا، فيدەل كاسترو باۋىرجان مومىشۇلىمەن قاتار ءومىر بويىنا جاقسى كورىپ، ءومىر بويىنا ءوزىن قارىزدار سەزىنىپ كەلە جاتقان قازاقتىڭ جانە ءبىر باتىر پەرزەنتى بار ەكەنىن بۇگىنگى تاڭدا ەشكىم دە بىلمەيدى، بىلەتىن از قاۋىمنىڭ ءوزى ول جايىندا ءتىس جارىپ ايتا المايدى. ول دارا تۇلعا - تۇرسىنحان مۇساقانوۆ! ءيا، ءدال تاپتىڭىز، الماتى وبلىسىنىڭ اكىمى بولعان، قازىردە سەناتور اڭسار مۇساقانوۆتىڭ اكەسى، ۇزىن بويلى، تاۋ تۇلعالى، كوپ سويلەمەيتىن، كوپشىلىك جيىندارعا بەتالدى بارا بەرمەيتىن، قاراتورى سۇستى كەلبەتتى ءبىرتوعا جان تۇرسىنحان اعامىز.
كەڭەس وداعى مەن اقش اراسى قاتتى ۋشىعىپ تۇرعان ساتتە قۇپيا قىزمەتتىڭ ورتالىق شتابىندا باسشىلىق قىزمەت اتقارعان جانات اتانىڭ ايتۋىنشا، تۇرسىنxان فيدەلدىڭ جەكە وققاعارى بولىپ بەلگىلەنىپ، كۋبا توڭكەرىسى كەزدەرىندە جالىندى كوسەمنىڭ قاسىنان ءبىر ەلى دە قالماعان. سونداي قاربالاس زاماندا فيدەلگە قاستاندىق جاسالعاندا تۇرسىنحان ءوز كەۋدەسىن توسىپ ونى اجالدان امان الىپ الادى. ۋ جەبە-ينە تۇرسىنحاننىڭ كەۋدەسىنە كيگەن ساۋىتتى تەسىپ ءوتىپ، دەنەسىنە بولماشى عانا زاقىم كەلتىرەدى. الايدا اسا كۇشتى ۋ وققاعاردى ەستەن تاندىرىپ جىبەرەدى. ساۋىتتى دەرەۋ شەشىپ ۇلگەرگەن قاتارلاستارى تۇرسىنحاننىڭ ءومىرى ءۇشىن كۇرەسىپ جاتقاندا فيدەل ءومىرى شەشپەيتىن اسكەري كۇرتەشەسىن دەرەۋ شەشىپ جىبەرىپ، قازاق باتىرىنىڭ ۇستىنە جاپقان ەكەن. ەگەردە، تۇرسىنحان ەسكى ماملۇكتەردەي جانىن پيدا ەتىپ شالت قيمىلداماعاندا، كۋبا توڭكەرىسى فيدەلسىز مۇلدەم ءسونىپ قالار ما ەدى، ال كۋبا توڭكەرىسى بولماسا اقش ايقىن باسىمدىلىققا يە بولىپ، ادامزات تاريحى باسقاشا باعىتتا دامۋ قارقىنىنا دۋشار بولار ما ەدى؟! ەسكە الاتىن، بىلمەگەنىمىزدى تۇگەندەيتىن، ءتاۋبا مەن شۇكىرگە كوپ جۇگىنەتىن تاريحي ساباقتارىمىز مول اۋ، ءسىرا؟!
