بيىل سوزاق اۋداندىق اۋىل شارۋاشىلىعى ءبولىمىنىڭ  تاراپىنان قولعا الىنعان اۋىل شارۋاشىلىعى مالدارى ەتىن ەكسپورتقا شىعارۋ جونىندەگى جۇمىستار وڭ ناتيجەسىن بەردى.

وسى جىلدىڭ تامىز ايى مەن قازان ايىنىڭ ءبىرىنشى ونكۇندىگى ارالىعىندا «قارا قۇر» وندىرىستىك كووپەراتيۆىندە وسىرىلگەن 2688 باس ەركەك قاراكول توقتىلارى بىرىككەن اراب امىرلىكتەرىنە ەكسپورتقا شىعارۋ ءۇشىن ساتىلدى.

بىرىككەن اراب امىرلىكتەرىنە ەكسپورتقا ۇساق مال مەن قوي، سيىر، تۇيە ەتىن شىعارۋمەن اينالىساتىن «ديسادا» ءجشس-نىڭ ديرەكتورى سۇلەيمانوۆ سانات: «ءبىز سوزاق اۋدانى «قارا-قۇر» وندىرىستىك كوپەراتيۆىنەن 2 پارتيا، بارلىعى 2688 باس ۇساق مال تولدەرىن ەكسپورتقا شىعارىپ وتىرمىز. الداعى كەزەڭدە اراب مەملەكەتتەرىنە ەكسپورتقا اۋدان اگروقۇرىلىمدارىنان ۇساق مال مەن سيىر، تۇيە ەتىن شىعارۋ ءىسىن جۇيەلى تۇردە جالعاستىراتىن بولامىز»، - دەيدى.

مۇنان بولەك، سەرىكتەستىكتىڭ بىرىككەن اراب امىرلىكتەرىنە 50 مىڭ باس ۇساق مال ءتولىن ساتۋ جونىندە كەلىسىمشارتى بار. بۇگىندە ەكسپورتقا تىرىدەي مال تولدەرىن شىعارۋمەن اينالىسىپ جۇرگەن شارۋالار كەلەشەكتە سوزاقتىڭ تاۋكەنت كەنتىندە ورنالاسقان «تاۋكەنت مال سويۋ سەحىن» كۇردەلى جوندەۋدەن وتكىزىپ، ىسكە قوسۋدى جوسپارلاپ وتىر. مال سويۋ سەحى ىسكە قوسىلعاندا مۇزداتىلعان اۋىل شارۋاشىلىعى مالدارىنىڭ ەتىن دە شەتەل نارىعىنا شىعارۋعا مۇمكىندىك پايدا بولماق.  

سوزاق اۋدانى اكىمدىگىنىڭ باسپا ءسوز قىزمەتى