وتىرار اۋدانىندا جۇگەرى كلاستەرى داميدى. بۇل تۋرالى «وتىرار» تەلەارناسى حابارلادى.

اۋداندا جۇگەرى شارۋاشىلىعى جاقسى دامىپ كەلەدى. جۇگەرىنى وڭدەيتىن كاسىپورىن دا اشىلعان. ۇكىمەتتىڭ جەرگىلىكتى جەرلەردە اگروكەشەندەردى دامىتۋ باعدارلاماسى اياسىندا اشىلعان بۇل كاسىپورىندا بۇگىندە 30-عا جۋىق ادام ەكى قولعا ءبىر كۇرەك تاپقان. سولاردىڭ ءبىرى — ايگۇل مەدەلحانوۆا. ەپتى كەلىنشەك كۇن سايىن 500 كەلى جۇگەرى ارشيدى. كۇندەلىكتى تابىسى ورتاشا ەسەپپەن 5-8 مىڭ تەڭگەنى قۇرايدى ەكەن. كاسىپورىن تىڭ تەحنولوگيامەن جۇمىس ىستەيدى. الدىمەن جۇگەرى ءدانى سوبىعىنان الىنىپ، كەپتىرىلەدى. سودان كەيىن قامبالاردا ساقتالادى. كەپتىرەتىن قۇرال-جابدىقتار انگليادان، ساقتاۋ قۇرىلعىلارى قىتايدان ارنايى الدىرىلعان.

جۇگەرى وڭدەۋ زاۋىتى — وتىرار اۋدانىنداعى «ۇدەمەلى يندۋستريالدى-ينووۆاسيالىق دامۋ»، «بيزنەستىڭ جول كارتاسى 2020» باعدارلامالارى اياسىندا قولعا الىنعان جوبالاردى جۇزەگە اسىراتىن يندۋستريالدى ايماقتا بوي كوتەرگەن العاشقى كاسىپورىن. تاياۋدا وسىندا جۇگەرى كلاستەرىن دامىتۋ اياسىندا داقىلدى تەرەڭ وڭدەيتىن قوس بىردەي ءوندىرىس وشاعى اشىلماق. دەمەك، جۇگەرى شارۋاشىلىعىمەن اينالىساتىن شارۋالاردىڭ ايى وڭىنان تۋعالى تۇر دەيدى ماماندار.

ايتا كەتەيىك، اۋداننىڭ برەندىنە اينالعان داقىل بيىل 7 مىڭ گەكتارعا ەگىلىپ، ءار گەكتارىنان 120 سەنتنەردەن ءونىم الىنىپتى. وتىرار ءوڭىرى 2020 جىلعا دەيىن القاپتى 15 مىڭ گەكتارعا جەتكىزىپ، جۇگەرى كلاستەرىنە جول اشپاق.

وتىرار اۋدانىنداعى يندۋستريالدى ايماق ءشاۋىلدىر مەن تەمىر ەلدى مەكەندەرىنىڭ اراسىنداعى 97 گەكتارجەردە قۇرىلعان. قازىرگى كۇنى مۇندا 3 جوبا جۇزەگە اسىپ، قۇرىلىس جۇمىستارى ءجۇرىپ جاتىر. وبلىستىق كاسىپكەرلىك باسقارماسىنا 6 جوبا ۇسىنىلۋدا.