شىرت ۇيقىدا جاتقان بالالار ءورت دابىلىنان شوشىپ ويانعان. سويتسە، ەكىنشى قاباتتاعى ويىن بولمەسىنەن وت شىعىپتى. ءورت سوندىرۋشىلەر كەلگەنشە جالىن جوعارىعا تارالىپ، نىساننىڭ شاتىرىنا دەيىن جەتكەن.

بۇل تۋرالى كتك ارناسى حابارلايدى. 

گۇلميرا قۇندىبايەۆا، №1 بالالار ءۇيىنىڭ ديرەكتورى:

-بالالار ويىن بولمەسى كادىمگى، ول جەردە تەليەۆيزور، ديۆان، شكاف تۇرعان.

قۇتقارۋشىلار كەلگەنشە وسىنداعى 161 بالا مەن 12 قىزمەتكەر تەرەزە ارقىلى دالاعا شىققان. ال ماماندار ءورتتى ءبىر ساعاتقا جۋىق ۋاقىتتىڭ ىشىندە اۋىزدىقتادى. اپ-ساتتە 180 شارشى مەتر اۋماقتى قىزىل جالىن شارپىپ ۇلگەرىپتى. توتەنشە جاعدايدان 4 تاربيەلەنۋشى مەن قىزمەتكەرلەردىڭ ءبىرى زارداپ شەككەن. ءقازىر ءتۇرلى جاراقات العان جەتكىنشەكتەر اۋرۋحانادا ەم قابىلداۋدا.

نۇرجان يسابەكوۆ، الماتى قالاسى دەنساۋلىق ساقتاۋ باسقارماسىنىڭ باس حيرۋرگى:

- ءبىر ناۋقاستىڭ كەۋدە ومىرتقاسى سىنعان. 3 ناۋقاستىڭ ءىش قۇرىلىسىنىڭ جابىق جاراقاتى بار.

نەگىزى، بۇل مەكەمەدە اتا-انا قۇقىعىنان ايىرىلعانداردىڭ بالالارى تۇرادى. قىزىل جالىندى ءوز كوزدەرىمەن كورگەن تاربيەلەنۋشىلەر تۇندەگى جاعدايدان ابدەن شوشىپ قالعان. ەندى ولارمەن پسيحولوگتار جۇمىس ىستەمەك. ءقازىر بالالار عيماراتتىڭ وزگە بولىگىنە جايعاستى. ال ورتەنىپ كەتكەن جەرىندە قۇتقارۋشىلار جۇمىس ىستەۋدە. ولار بولمەلەردى قيراندىدان تازارتىپ جاتىر.

ازىرگە ءورتتىڭ ناقتى نەدەن شىققانى بەلگىسىز. دەگەنمەن، توتەنشە جاعداي قىزمەتكەرلەرى وعان توقتان اجىراتىلماي قالعان تۇرمىستىق تەحنيكالار سەبەپ بولۋى مۇمكىن دەپ وتىر.

ساندۋعاش بايمۇحامبەتوۆا، الماتى قالالىق تجد رەسمي وكىلى:

- ءورت ورنىندا رازەتكاعا قوسىلىپ قالعان تەلەديدار جانە دە ۇتىكتىڭ ولشەمدەرى تابىلعان .ءبىراق، ماتەريالداردىڭ ءبارى جيناقتالىپ، ىشكى ىستەر دەپارتامەنتىنە جونەلتىلەدى.

باعاناشىلداعى الماتى وبلىستىق №1 بالالار ءۇيى بۇعان دەيىن دە ءورت سوندىرۋشىلەردىڭ نازارىنا ىلىككەن. ياعني مەكەمەدەن ماۋسىمداعى جوسپارلى تەكسەرىس كەزىندە 9 بىردەي زاڭ بۇزۋشىلىق انىقتالىپتى. ءبىراق ەسكەرتۋدەن كەيىن ونىڭ ءبارى رەتكە كەلتىرىلگەن كورىنەدى. ال تۇندەگى وقىس وقيعانىڭ ناقتى سەبەبى ساراپتامادان كەيىن ءمالىم بولادى.