قازاقستان ەكونوميكالىق تۇرعىدا دامۋ ءۇشىن ەلگە ينۆەستيسيا تارتىپ، زاۋىت-فابريكالار سالىپ، اۋىل شارۋاشىلىعىن اياقتان نىق تۇرعىزۋى ماڭىزدى. سوندا عانا ەكونوميكاسى ءار تاراپتاندىرىلعان مەملەكەت باسەكەگە قابىلەتتى بولا الادى. باسەكەگە قابىلەتتى ەلمەن وزگە رەسپۋبليكالار ساناسىپ، تەڭ دارەجەدە ىسكەرلىك قارىم-قاتىناس ورناتقىسى كەلەدى. ارينە، اۋىل شارۋاشىلىعىندا ەڭ ماڭىزدى نارسە – مال تۇقىمدارى مەن وسىمدىك سورتتارىن اسىلداندىرۋ. اسىلداندىرىلعان مال مەن وسىمدىك مول ءونىم بەرەدى. وسى ماقساتتا «اگروبيزنەس 2020» باعدارلاماسى ىسكە قوسىلىپ، كوپتەگەن تىرلىكتەر اتقارىلدى. سونىڭ ءبىر ايقىن دالەلىن تۇركىستاندا كوردى. تۇركىستاندا ءداستۇرلى تۇردە وتەتىن «اق كەرۋەن» ماقتا تەرىمى شاراسى كەزىندە جوعارى ساپالى «تۇركىستان» ماقتا سۇرىبى شىعارىلعانى ايتىلىپ، جۇرتشىلىققا تانىستىرىلدى. وسىلايشا، قاراشىق اۋىلدىق وكرۋگىندەگى «تۇران» شارۋا قوجالىعىندا وتكەن جيىنعا كەلگەن قاتىسۋشىلار، الدىمەن، ماقتا القاپتارىن ارالاۋدان باستادى. 

بيولوگيا عىلىمدارىنىڭ دوكتورى A.سۇلتانوۆ پەن اۋىل شارۋاشىلىعى عىلىمدارىنىڭ كانديداتى ءا.الييەۆ سورتتاردىڭ ەرەكشەلىكتەرى تۋرالى اڭگىمەلەپ بەردى. ەرەكشەلىگى سول، بۇل ماقتا تالشىعىنىڭ ۇزىندىعى كادىمگى سۇرىپتاعى ماقتاعا قاراعاندا الدەقايدا جوعارى. ياعني، «تۇركىستان» ماقتاسىنىڭ تالشىعى 4-ۇلگىگە جاتادى. ماقتانىڭ بۇل ءتۇرى توقىما ونەركاسىبىندە كەڭىنەن پايدالانىلادى. ەندى تۇركىستاندىق كاسىپكەرلەر وڭتۇستىكتەگى توقىما كاسىپورىندارىن جەرگىلىكتى شيكىزاتپەن قامتۋعا تولىق كەپىلدىك بەرە الادى.ايتا كەتەيىك، تۇركىستاندىق ماقتاشىلار بيىل 17 مىڭ توننا ءشيتتى ماقتا جيناۋعا نيەتتى. قالا اكىمىنىڭ ورىنباسارى ت.مۇسايەۆتىڭ ايتۋىنشا، تۇركىستاندا وتكەن جىلى 3500 گەكتار جەرگە ماقتا ەگىلسە، بيىل بۇل كورسەتكىش 6600 گەكتارعا ۇلعايعان. مىنە، وسىلايشا تۇركىستان ماقتانى اسىلداندىرىپ، ەلگە ءوز ەڭبەگىن سىڭىرۋدە. 

rgmedia.kz