2016 جىلعى 26 قازاندا قازاقستان رەسپۋبليكاسىنىڭ ينۆەستيسيالار جانە دامۋ مينيسترلىگىنىڭ مەديا-ورتالىعىندا ۆيسە-مينيستر ب.كامالييەۆ، سونداي-اق، ازاماتتىق اۆياسيا جانە كولىك كوميتەتتەرىنىڭ ءتوراعالارى ب.سەيداحمەتوۆ جانە ا.اساۋبايەۆتىڭ قاتىسۋىمەن باسپاسوز-كونفەرەنسياسى ءوتتى.
سپيكەرلەر جۋرناليستەرگە «نۇرلى جول» مەملەكەتتىك باعدارلاماسىنىڭ، «100 ناقتى قادام» ۇلت جوسپارىن جۇزەگە اسىرۋدىڭ ارالىق ناتيجەلەرى، سونىمەن بىرگە، ەلىمىزدىڭ كولىك-لوگيستيكالىق الەۋەتىن ودان ءارى دامىتۋ بويىنشا مينيسترلىكتىڭ اتقارىپ جاتقان جۇمىستارى تۋرالى ايتىپ بەردى.
بيىل 9 ايدا «نۇرلى جول» باعدارلاماسى اياسىندا قايتا جاڭعىرتىلىپ جاتقان جولدارداعى جوسپارلانعان قۇرىلىس جۇمىستارىنىڭ 75%-ى اياقتالدى. جەر توسەمدەرىنىڭ قۇرىلىسى، نەگىزگى قابات جابدىقتارىن توسەۋ، جاساندى عيماراتتار مەن كوپىرلەردەگى جۇمىستار ورىندالدى.
ۋچاسكەلەردە 756 شاقىرىمعا ءاسفالتتى جانە سەمەنت بەتوندى جابىندار توسەلدى. شامامەن 3 ملن. توننا قيىرشىق تاس، 250 مىڭ توننا سەمەنت، 125 مىڭ توننا بيتۋم پايدالانىلدى. بۇلار وتاندىق ونىمدەر. بۇل جۇمىستارعا 75 مىڭ ادام، 30-دان استام مەردىگەر ۇيىم جۇمىلدىرىلدى. ولاردىڭ 20-سى وتاندىق كومپانيا.
بۇعان دەيىن حابارلاعانىمىزداي، جىل سوڭىندا «باتىس ەۋروپا – باتىس جۇڭگو» ترانزيتتىك ءدالىزى قوزعالىسىن اشۋ جوسپارلانۋدا. سونىمەن قاتار، استانا-تەمىرتاۋ، الماتى-قاپشاعاي-تالدىقورعان، بەينەۋ-شەتپە جانە كوكشەتاۋ-پەتروپاۆل باعىتتارى دا اشىلادى.
«ورتالىق-وڭتۇستىك، ورتالىق-شىعىس، بەينەۋ-اقتاۋ، اقتوبە-اتىراۋ-استراحان، الماتى-وسكەمەن، استانا-پەتروپاۆل-رەسەي فەدەراسياسىنىڭ شەكاراسى، ورال-كامەنكا، ۇزىناعاش-وتار، جەتىباي-جاڭاوزەن جوبالارىنداعى جۇمىستار جالعاساتىن بولادى. جالپى 6000 شاقىرىمعا جۋىق جولدى قايتا جاڭعىرتۋ جوسپارلانىپ وتىر»، - دەپ اتاپ ءوتتى ب.كامالييەۆ.
سونىمەن بىرگە، مينيسترلىك الەۋمەتتىك ماڭىزى بار باعىتتار بويىنشا جولاۋشىلار تاسىمالىن سۋبسيديالاۋدىڭ جاڭا مەحانيزمىن ەنگىزدى. ءتيىستى زاڭعا قازاقستان رەسپۋبليكاسىنىڭ پرەزيدەنتى 2016 جىلى 9 ساۋىردە قول قويدى.
جاڭا مەحانيزم سۋبسيديالاۋ جۇيەسىنىڭ اشىقتىعىن قامتاماسىز ەتۋگە جانە تەمىرجول جولاۋشىلار تاسىمالى سالاسىنا ينۆەستيسيا تارتۋعا باعىتتالعان. سونداي-اق، جولاۋشىلار تاسىمالىن ورتاشا 15-20 جىلعا ۇزاقمەرزىمدى قارجىلاندىرۋ كوزدەلىپ وتىر. بۇل زاەمدىق قارجىلار جولاۋشىلار ۆاگونىن ساتىپ الۋعا ينۆەستيسيا تارتۋعا جانە جاڭا تەحنولوگيالاردى كەڭەيتۋگە مۇمكىندىك بەرەدى. وسىلايشا، جولاۋشىلار تاسىمالى ساپاسىن ارتتىرۋدى قامتاماسىز ەتەتىن بولادى.
مينيسترلىك وتاندىق جانە حالىقارالىق اۆتوموبيل تاسىمالى سالاسىن ارتتىرۋ بويىنشا جوسپارلى جۇمىس جۇرگىزىپ جاتىر. 2016 جىلى اۆتوبۋس پاركىن 10% جاڭارتۋ كوزدەلۋدە جانە حالىقارالىق نارىقتا قازاقستاندىق تاسىمال ۇلەسىن 43% دەيىن ۇلعايتۋ جوسپارلانۋدا.
بۇدان بولەك، ق ر يدم قازىرگى ۋاقىتتا استانا اۋەجايىنىڭ جولاۋشىلار تەرمينالىن قايتا جاڭعىرتۋ جۇمىستارىن جالعاستىرۋدا. بيىل جىل سوڭىنا دەيىن پەتروپاۆل قالاسى اۋەجايىنىڭ اۋيەۆوكزالى مەن ۇشۋ-قونۋ جولاقتارىن قايتا جاڭعىرتۋ جۇمىستارىن اياقتاۋ كوزدەلۋدە. 2017 جىلدىڭ باسىندا سەمەي اۋەجايىنداعى ۇشۋ-قونۋ جولاقتارىن قايتا جاڭعىرتۋ جوسپارلانىپ وتىر. 2020 جىلدىڭ سوڭىنا دەيىن قوستاناي مەن وسكەمەن اۋەجايلارىنىڭ ۇشۋ-قونۋ جولاقتارى قايتا جاڭعىرتىلادى.
«100 ناقتى قادام» ۇلت جوسپارى اياسىندا الماتىدا حالىقارالىق اۆياسيالىق حاب قۇرۋ بويىنشا جۇمىستار جۇرۋدە. وسى جۇمىستار شەڭبەرىندە جاڭا اۋەجاي قۇرىلىسى ارقىلى الەۋەتتى ينۆەستورلاردى تارتۋ كوزدەلۋدە.
سونداي-اق، ۇلت جوسپارىنىڭ 73-قادامىن ورىنداۋ شەڭبەرىندە استانانىڭ حالىقارالىق قارجى ورتالىقتارىمەن بايلانىسىن قامتاماسىز ەتۋ بويىنشا جۇمىستار جۇرگىزىلۋدە. بۇگىنگى كۇنى استانادان 5 حالىقارالىق قارجى ورتالىعىنا تىكەلەي ۇشۋ ورىندالادى (فرانكفۋرت، لوندون، دۋباي، گونكونگ، سەۋل). سونداي-اق، ۆەنا، پاريج، ابۋ-دابي، پەكين، ستامبۋل، ءۇرىمشى، بانگكوك، شاردجا، مينسك، ماسكەۋ، باكۋ، تاشكەنت، كييەۆ، بىشكەك، تبيليسي جانە ت.ب. قالالارعا تىكەلەي رەيستەر جۇزەگە اسىرىلادى. 2017-2020 جىلدارى توكيو، سينگاپۋر، شانحاي جانە نيۋ-يوركپەن اۋە قاتىناستارىن اشۋ جوسپارلانىپ وتىر.
