اقىن تۇمانباي مولداعالييەۆ جايعان داستارقان باسىندا حاميت ەرعالييەۆ، عافۋ قايىربەكوۆ، ساعي جيەنبايەۆ باستاعان ءبىر توپ اقىندار بولسا كەرەك. ءبىر كەزدە ءسوز كەزەگىن عافۋ قايىربەكوۆ الادى دا، ءىقىلاس-ىلتيپاتىن ورتالارىنداعى جاسى ۇلكەن اقىن اعاسى حاميت ەرعالييەۆكە ارنايدى: «ءبىر توپ جۇيرىك دالانىڭ شاڭىن اسپانعا كوتەرىپ، شاۋىپ كەلە جاتىر، – دەپ باستايدى عافۋ ادەتتەگىدەي ارقالانا سويلەپ، – كوپ دۇرمەكتىڭ الدىندا دالانىڭ اۋاسىن ەركىن جۇتىپ اق بوز ارعىماق، كەلەدى. سول ارعىماق ءسىزسىز، حاما. مەن اناۋ كوپ شوعىردىڭ ىشىندەمىن».
حاماڭ بۇل سوزگە قاتتى تولقىپ، كوزى جاساۋراپ، ورنىنان تۇرىپ عافۋدى قۇشاقتاپ، ءۇنسىز سۇيەدى.
سودان، ءبىر مەزگىلدە ءسوز كەزەگىن حاميت ەرعالييەۆتىڭ ءوزى العاندا: «عافۋ، راس ايتاسىڭ، ءبىر توپ جۇيرىك دالانىڭ شاڭىن اسپانعا كوتەرىپ شاۋىپ كەلە جاتىر. سول دالانىڭ تازا اۋاسىن ەركىن جۇتىپ، مەن اعىپ كەلە جاتقانىمدا، سوڭىمنان قارا ۇزبەي كەلە جاتقان تورى قۇناننىڭ دەمىن ەستيمىن. ادىمىمدى كەڭ الىپ، سەرمەي تۇسەمىن. الگى قۇنان دا قالىسار ەمەس، ماعان جەتەر-جەتپەس جەردە كەلە جاتىر. سول سەنىڭ قۇنانىڭ، عافۋجان!» دەگەن ەكەن.
كەيىن ارادا جىلدار وتكەندە تۇمانباي حاماڭا ەركەلەپ الگى سوزدەردى ەسكە الىپ، «حاما، سول جىلعى قالىڭ دۇرمەكتىڭ ىشىنەن تاي مىنگەن ساعي ەكەۋمىز كوزىڭىزگە تۇسكەن جوقپىز با؟» دەپ ازىلدەيدى عوي.
سوندا حاماڭ اقىن ءىنىسىن بالەنباي جىل وكپەلەتىپ الدىم با دەگەندەي كوڭىلمەن قاۋقىلداپ: «تۇماش-اۋ، بار بولعاندا قانداي: سول كوپ دۇرمەكتىڭ ىشىندە جۇلدىزداي اعىپ، سۋىرىلا شاۋىپ كەلە جاتقان قوس قوڭىر – ساعي ەكەۋىڭنىڭ تايىڭ بولاتىن!» دەگەن ەكەن.
http://adebiportal.kz/
