اكىمدەر تاعى دا سىنعا ۇشىرادى. بۇگىن "استانادا ءوتىپ جاتقان  ءۇييدمب ىسكە اسىرۋعا ارنالعان يندۋستريالىق فورۋمدا ق ر پرەزيدەنتى نۇرسۇلتان نازاربايەۆ قازاقستاندىق قامتۋ بويىنشا ءتيىستى جۇمىستاردى اتقارماي وتىرعان اكىمدەر مەن ۆەدومستۆولاردى سىنعا الدى"- دەپ حابارلايدى  «قازاقپارات» اگەنتتىگى.

 ەلباسى قازاقستاندىق قامتۋ بويىنشا  «تەڭىزشيەۆرويل» كومپانياسىندا كورسەتكىش 4 پايىزدان استام، قاشاعان جوباسىندا 2 پايىز، «اقتوبەمۇنايگاز» كومپانياسىندا 1،4 پايىز، «قازحروم» كومپانياسىندا 3،8 پايىز دەڭگەيىندە ەكەندىگىن اتاپ كورسەتە وتىرىپ، جەرگىلىكتى باسقارۋ ورىندارىنىڭ قىزمەتتەرىنە سىني كوزقاراس تانىتتى.

«ءبىز قازاقستاندىق قامتۋعا بەلسەندى كىرىسكەن بولاتىنبىز. الايدا، وتكەن جىلى مەملەكەتتىك ورگانداردا ءونىمدى ساتىپ الۋ كولەمى 5 پايىزعا تومەندەدى. ياعني، ءوسىم بولعان جوق»، - دەدى ەلباسى.

«مەن وسى كومپانيالارمەن اتالعان ماسەلە تۇرعىسىندا جۇمىس ىستەمەي وتىرعان اكىمدەردى نازارعا العىم كەلەدى. سونىمەن قاتار ءتيىستى جۇمىستاردى اتقارۋى ءتيىس مينيسترلىكتەر دە كوڭىل ءبولۋى قاجەت»، - دەپ اتاپ ءوتتى ن. نازاربايەۆ.

اتالمىش كومپانيالاردىڭ قازاقستان اۋماعىندا بولعاندىقتان ونىڭ باسشىلارى قازاقستاندىق قامتۋ بويىنشا ەل زاڭناماسىنىڭ تالاپتارىن ورىنداۋعا مىندەتتى ەكەندىگىن ەسكە سالدى.

«بۇل احۋال شەشىمدى تۇزەتۋلەردى قاجەت ەتەدى. ۇكىمەت وسى جاعدايدى تۇزەتۋى ءتيىس. وتاندىق تاۋارلاردى ساتىپ الۋدا كەن ورىندارىن پايدالانۋشىلاردى ىنتالاندىرۋ ءۇشىن كەرەك بولسا نورماتيۆتىك بازاعا سايكەس وزگەرىستەردى ەنگىزۋ قاجەت. بۇل ماسەلە تۇرعىسىندا قاجەتتىلىك ەتسە زاڭنامانى دا قاراستىراتىن بولامىز»، - دەپ تۇيىندەدى مەملەكەت باسشىسى.