جاساعان يەم، جاراتۋشى قۇدىرەت – اللا تاعالانىڭ 99 اتى بار. تاسپيح مونشاقتارى – 99.
***
بىرەۋلەرگە قۇداي ءبارىن بەرەدى. بايلىق تا بار، التىن، گاۋھار، ءىنجۋ-مارجان – ءبارى بار. ءتورت قۇبىلاسى ساي.
ءبىراق يمان جوق.
ەڭ سورلى ادام - سول.
ءبىر كەم دۇنيە.
***
جالعان دۇنيەدەن وتەر الدىندا جارتى الەمدە جاۋلاعان ءامىر تەمىر جانىنداعىلارعا امانات ايتتى:
- مەن ولگەن سوڭ جىلاپ-سىقتاپ، داۋىس كوتەرمەڭدەر. ونىڭ تۇككە قاجەتى جوق. اجالدى بىرەۋ ايقالاپ، قورقىتىپ قۋادى ما ەكەن؟ كيىمدەرىڭدى جىرتىپ، جىندى ادامشا جۇگىرگەننەن گورى اللادان «اللاھۋ اكبار» دەپ ماعان مەيىرىم تىلەڭدەر. جۇرەگىمدى جىلىتۋ ءۇشىن «فاتيحانى» وقىڭدار.
جارتى الەمدى جاۋلاعان ءامىر تەمىر دە مەيىرىمگە مۇقتاج.
ءبىر كەم دۇنيە...
***
ءتاڭىردىڭ قۇدىرەتىنە تاڭ قالاسىڭ. قۇدىرەت الەمدى ءادىل، ساعات تەتىگىندەي ءمىنسىز جاراتتى.
ءبارى ءتارتىپتى: كۇن دە، اي دا، جەر دە تەك ءوز جولىمەن جۇرەدى. سانسىز جۇلدىزدار دا ءبارى تۋرا جولمەن جۇرەدى.
ال ادامدار شە؟
پايعامبارلار، ساحابالار، اسا ءبىر دانىشپاندار بولماسا، كوبى قيسالاڭداي بەرەدى. بۇرالاڭ جولدارعا تۇسەدى. اداسادى، سۇرىنەدى، قۇلايدى.
- ە، قۇداي، نە جازدىم؟! – دەپ جىلايدى.
قۇداي جولىمەن جۇرسەڭ، جىلامايسىڭ.
ءبىراق سونى ۇمىتا بەرەدى.
ءبىر كەم دۇنيە.
***
تەمىردى تات شىرىتەدى. تات تەمىردىڭ وزىنەن شىعادى.
ادامدى ازدىراتىن جامان قىلىقتار دا وزىڭنەن شىعادى. ول دا تات. ونى سابىنداپ جۋىپ كەتىرە المايسىڭ.
ادام جانىن تات باسسا، ونى تەك كىتاپ كەتىرە الادى. ارينە، اسىل كىتاپ، ادال كىتاپ.
ەڭ ءبىرىنشى – قۇران!
ەكىنشى – حاديستەر!
ۇلى كلاسسيكتەر.
قازاقتىڭ ۇلى اقىن-جازۋشىلارى.
كىتاپ جەم، سۋ سۇرامايدى. كىتاپ – عاجايىپ قازىنا.
كىتاپ - ومىرسەرىك.
كىتاپتى سۇيمەگەن قۇدايدى دا سۇيمەيدى.
ءبىر كەم دۇنيە.
***
اكەمىز مۇرتازا مارقۇمنىڭ قىزعىلتىم شىرايلى، ادەمى گۇلدەرى جايناعان جاپ-جاڭا جاينامازى بار ەدى.
الدىمەن مەشىت بۇزىلدى. ونىڭ ءۇيىندى بولىپ قالعان كىرپىشتەرىنىڭ ۇستىندە بايعىز دەيتىن قۇس سۇڭقىلداپ، زارلاپ وتىراتىندى شىعاردى.
كوپ ۇزاماي مۇرتازا راحمەتىلىك «حالىق جاۋى» رەتىندە ۇستالدى. بۇل 1937 جىلدىڭ، ءسىرا، جەلتوقسان ايى ەدى.
نكۆد ۇيگە ءتىنتۋ جاسادى. مەن ول كەزدە بەس جاسار بالامىن. ءبارى ەسىمدە. تىنتكەندە بالەندەي بايلىق تابىلعان جوق. تەك ءبىر ميليسيونەر توردە ءىلۋلى تۇرعان جاينامازدى جازىپ كوردى دە: «ە، مىناۋ شۇلعاۋ بولۋعا جاقسى ەكەن. اياعىم توڭىپ ءجۇر ەدى»، - دەپ اللانىڭ اتى جازىلعان جاينامازدى بۇكتەپ-بۇكتەپ، قوينىنا تىعا سالدى...
ارادا الپىس جىل وتكەندە جولىم ءتۇسىپ، كەرەكۋ قالاسىنا بارىپ، مەشىتىنە كىرىپ، دۇعا وقىعاندا، ءتاڭىرى جارىلقاعىر باس يمام ماعان قاعباداعى مەشىتتىڭ سۋرەتى سالىنعان سۇلۋ جاينامازدى سىيلادى. سوندا باياعى ميليسيونەرگە شۇلعاۋ بولىپ، قورلانعان جايناماز عايىپتان قۇس بولىپ كەلىپ، قولىما قونعانداي عاجايىپ حال كەشتىم.
ءبىر كەم دۇنيە.
***
سامايعا اق كىرىپ ەدى، مۇرت تا اعارا باستادى. ۇيالعان ۇرىداي بولىپ قاستىڭ ءبىر تالى دا اعارىپتى.
سويتە-سويتە... سۇيەك تە اعارادى-اۋ...
نەسىنە تىرباڭدايمىز؟
ءبارى دە وتەدى.
وتپەيتىن تەك ۋاقىت قانا.
ادامدار: «ۋاقىت ءوتىپ بارادى»، - دەپ وكىنەدى. شىنىندا ءوتىپ بارا جاتقان ۋاقىت ەمەس، ءومىر ءوتىپ بارادى.
ال ۋاقىتتىڭ باسى دا، اياعى دا جوق.
ۋاقىتتى جىلعا، ايعا، ساعاتقا، مينوتكە، سەكوندكە، عاسىرعا ءبولىپ جۇرگەن ادامدار عوي.
ۋاقىت – ماڭگىلىك. ماڭگىلىك باستالمايدى دا، اياقتالمايدى دا.
ءبارىن ءبىر اللا بىلەدى.
اللا ءبىلىمى شەكسىز.
ءبىلىمى شەكتەۋلى ادامدار.
ءبىر كەم دۇنيە.
"ءبىر كەم دۇنيە" كىتابىنان
