ۆاسيليي ليەۆيت وليمپيادادان العان سىياقىسىن جۇمساۋعا ۋاقىتى جوق ەكەنىن مالىمدەدى، دەپ جازدى sports.kz.

«شىنىمدى ايتسام، سىياقىمدى ءالى جۇمساعان جوقپىن. ول جاعىن ويلايتىن مەنىڭ ءتىپتى، ۋاقىتىم دا جوق. ويىمدى بولمەۋ ءۇشىن بۇل ءىستى كەيىنگە شەگەرىپ قويدىم. ءقازىر كوپتەگەن ءىس-شارالار ءوتىپ جاتىر. ءبىزدى نازاردان تىس قالدىرماي، كىشكەنتاي دا بولسىن ەڭبەگىمىزدى باعالاپ جاتقانى قۋانتادى. العىستان باسقا ايتارىم جوق»، – دەدى ۆاسيليي ليەۆيت.

ول سونداي-اق، جاڭا جىلعا ارنالعان ءفيلمنىڭ ءتۇسىرىلىمى تۋرالى دا ايتىپ بەردى.

«مەن وزىمە قاتىستى ەپيزودتارعا ءتۇستىم. بۇل مەن ءۇشىن ۇلكەن تاجىريبە بولدى. ارينە، ءوزىمدى اكتەرمىن دەپ ايتا المايمىن. مەن نەعۇرلىم سپورتقا جاقىنىراقپىن»، – دەدى ول.

بۇدان بولەك، ول قازاقستاندىق بوكسشىلاردىڭ الداعى جوسپارلارى تۋرالى ايتۋدى دا ەستەن شىعارمادى.

«كوماندامىز وسى ايدا سارىاعاشتا جينالادى، ال كەلەسى ايدا الماتىدا جالپى-فيزيكالىق دايىندىعىمىزدى باستايمىز. جەكپە-جەكتەر ماسەلەسى ءالى شەشىلگەن جوق، ول جاعى جاتتىقتىرۋشىلاردىڭ قولىندا»، – دەدى وليمپيادانىڭ كۇمىس جۇلدەگەرى.

ەستەرىڭىزگە سالا كەتەيىك، كەشە بوكستان ريو-دە-جانەيرو وليمپياداسىنىڭ كۇمىس جۇلدەگەرلەرى ۆاسيليي ليەۆيت پەن ادىلبەك نيازىمبەتوۆكە ەلباسى تاپسىرماسىنا سايكەس تاعى 100 مىڭ دوللاردان سىياقى بەرىلدى.