قاتتى بورانعا بايلانىستى 60 كولىك تاڭعى 8-گە دەيىن جولدىڭ اشىلۋىن كۇتىپ تۇرعان. ونىڭ ىشىندە 36 جەڭىل كولىك، 8 جۇك كولىگى بار. اتالعان كولىكتەردە 81 ادام بولعان، ونىڭ 5 بالا دەپ حابارلايدى kazinfo.today. «كازاۆتودور» اق وبلىستىق فيليالىنىڭ مالىمەتىنشە وتكەن تۇندە، ساعات 22.30 شاماسىندا اقكول اۋدانىنىڭ ماڭىندا كولىك كەپتەلىسى پايدا بولدى. توتەنشە جاعدايلار دەپارتامەنتى ءتۇسىندىرۋ جۇمىستارىن جۇرگىزدى. قاتتى بوراننان جول كورىنبەي قالعاندىقتان، جولدى جابۋعا تۋرا كەلدى. 23.00 بارلىق كولىك اقكولگە كەلىپ، 62 ادام (جۇرگىزۋشىلەر، جولاۋشىلار) جىلىتۋ پۋنكتەرىنە ورنالاستىرىلدى. اتاپ ايتساق - «كلوندايك»، «شارم» قوناق ۇيىنە. اۋدان اكىمدىگى ولاردى ىستىق تاماقپەن قامتاماسىز ەتتى.  

ءدال وسىنداي جاعداي اتباسار اۋدانىندا دا ورىن الدى. كەشكى ساعات 16.15 اتباسار-كوكشەتاۋ جولى جابىلعان. سونىڭ سالدارىنان 10 جەڭىل كولىك، 2 جۇك كولىگى دىتتەگەن جەرىنە جەتە الماي قالعان. وندا 17 ادام بولدى. جۇرگىزۋشىلەر مەن جولاۋشىلار جىلىتۋ ورىندارىنا بارۋدان باس تارتقان. تەك ءبىر جەڭىل كولىك №11 اگرارلىق-تەحنيكالىق كوللەدجىنە ورنالاستىرىلدى. بۋرابايدىڭ جىلىتۋ پۋنكتەرىنە 2 ادام اۋىر جۇك كولىگىمەن بارعان. ال ششۋچينسكىدە 2 ادام مەكتەپ ينتەرناتىنا ورنالاستىرىلدى.