ءبىر رەت قانا پايدالانۋعا ارنالعان جايالىقتاردى كوبى «پامپەرس» دەيدى. الايدا، «پامپەرس» ءبىر رەتتىك جايالىقتاردىڭ ءبىرىنىڭ اتاۋى. اعىلشىن تىلىنەن اۋدارساق «ەركەلەتۋ، الپەشتەۋ» دەگەن ماعىناعا يە بۇل ءسوز حالىق جادىندا جاقسى جاتتالدى. سوعان بولا بارلىق تۇرىنە وسىنداي اتاۋ بەرۋ، ارينە، دۇرىس ەمەس.
ءبىر رەتتىك جايالىقتاردى حح عاسىردىڭ سوڭىنا تامان امەريكانىڭ نەبراسكا شتاتى، ميلفورد قالاسىنىڭ تۇرعىنى ۆيكتور ميللز ەسىمدى ونەرتاپقىش ويلاپ تاپقان. ول حيميالىق تەحنولوگيا سالاسى بويىنشا وتىز بەس جىل «Procter@Gamble» كومپانياسىندا جۇمىس ىستەپ، تاپقىرلىعىمەن اتاعى شىققان. شەبەر زەينەتكە شىعىپ، قارتايعان شاعىندا جالعىز قىزىنان تۋعان جيەنىن باعۋعا تۋرا كەلگەن. ارينە، جۇمىس نارەستەنىڭ تەك تاماعىن بەرۋمەن عانا شەكتەلمەيدى. ءسابيدىڭ جايالىقتارىن قايتا-قايتا جۋىپ، ونى كەپتىرۋ دە كەرەك. قارت ادامعا قايتا-قايتا ءناجىس تازالاۋ دا وڭاي ەمەس. ءسويتىپ جۇرگەندە شالدىڭ ميىنا «جۋمايتىن جايالىق نەگە ويلاپ تاپپايمىن» دەگەن وي تۇسەدى. اقىرى ۆيكتور الەمدە العاش رەت نارەستەنىڭ ۇلكەن-كىشى دارەتىن بويىنا ءسىڭىرىپ الاتىن «جايالىق» ويلاپ تاۋىپ، ءوزىنىڭ جيەنى ارقىلى سىناقتان وتكىزەدى. الايدا، ونى سول كەزدە ەشكىم پايدالانا قويمايتىن. بۇگىنگى كۇنى كەز كەلگەن ءسابيدىڭ جانىنان تابىلاتىن دەڭگەيگە جەتتى. سەبەبى، ول انالار ءۇشىن قولايلى بولىپ وتىر.
اتالعان جايالىقتىڭ قاراپايىم جورگەكتەن ءبىرشاما ارتىقشىلىعى بارىن دا مويىنداۋىمىز قاجەت. ماسەلەن، نارەستە تەرىسى تىم نازىك بولعاندىقتان، كىشكەنە ىلعالدىڭ ءوزى ونى تىتىركەندىرەدى. ال، پامپەرس بالا تەرىسىن تىتىركەنۋدەن ساقتاپ، قالىپتى ۇستاۋعا جاقسى كومەكتەسەدى. الايدا، كەيبىر انالار پامپەرستىڭ پايداسى مەن زيانىن اجىراتا بىلمەيدى. سونىمەن…
جالپى، پامپەرستىڭ ىلعال سورعىش بولىگى سەلليۋلوزادان جانە جەلاتين ءتارىزدى پولياكريلات شاريكتەردەن جاسالادى. پولياكريلات ءوز سالماعىنان ەلۋ ەسە اۋىر ىلعالدى ءسىڭىرىپ جانە ۇستاپ تۇرا الادى. ونىڭ ۇستىنە بۇگىندە «تىنىس الاتىن»، ياعني اۋا وتكىزەتىن پامپەرستەر شىعارىلا باستادى. ولاردىڭ سىرتقى قاباتى ۇساق ساڭىلاۋلاردان تۇرادى، ال ماتەريالى ماقتا، ماتاعا ۇقساس. وسى ارقىلى بالا تەرىسىنە اۋا جەتىپ تۇرادى دا، ىلعال بۋ ىشتە تۇرىپ قالمايدى. الايدا، دارىگەرلەر پامپەرستى دۇرىس پايدالانا ءبىلۋ قاجەت ەكەنىن ايتادى.
«جالپى، سابيلەردى ءبىر جاس التى ايلىعىندا تۇبەككە وتىرعىزۋ كەرەك. بۇعان دەيىن پامپەرستى پايدالانعان ءجون. الايدا، دارىگەر رەتىندە ءبىز پامپەرستى دالاعا شىققاندا نەمەسە قوناققا، تاعى باسقا جەرلەرگە بارعاندا عانا كيگىزۋگە كەڭەس بەرەمىز. ونىڭ ىشىندە ەر بالالارعا پامپەرستى ءجيى كيگىزبەگەن ءجون. بۇل ءسابيدىڭ جەتىلۋىنە زيانىن تيگىزۋى مۇمكىن»
كوپتەگەن انالاردا سابيگە پامپەرس كيگىزۋ وتە زيان دەگەن تۇسىنىك باسىم. الايدا، بارلىق ماسەلە ونى دۇرىس پايدالانا بىلۋدە.
بىرىنشىدەن، پامپەرس تەرىنىڭ قۇرعاقتىعىن قاراپايىم جورگەكتەن گورى جاقسى ساقتايدى. سونىڭ ارقاسىندا جورگەك دەرماتيتى بۇگىندە سيرەك كەزدەسەدى. پامپەرس كيگەندە بالا تەرىسىنىڭ رن دەڭگەيى دە قالىپتى بولادى. ەكىنشىدەن، بالانىڭ تۇبەككە وتىرۋ مەزگىلى ونىڭ پامپەرس كيگەن-كيمەگەنىنە بايلانىستى ەمەس. بۇل – اتا-اناعا بايلانىستى جاعداي. دەمەك، بالاعا تۇبەككە وتىرۋدى دەر كەزىندە ۇيرەتە ءبىلۋ قاجەت. ۇشىنشىدەن، ۇنەمدەۋ ماقساتىندا پامپەرستى ءتيىستى ۋاقىتتان ۇزاق كيگىزۋگە بولمايدى. بۇنداي جاعدايدا ونىڭ بارلىق ارتىقشىلىقتارى جويىلادى. تورتىنشىدەن، ءسابي ۇنەمى پامپەرس كيىپ جۇرۋگە ءتيىستى ەمەس. ونى اۋىستىرعاندا دەمالۋعا مۇمكىندىك بەرىڭىز.
پامپەرس قانشا قىمبات بولسا دا، ونى پايدالانعاندا ءبىرقاتار ەرەجەلەردى ساقتاۋ كەرەك. بالانى ءبىر پامپەرستە 6 ساعاتتان ارتىق ۇستاماڭىز. ونى 4 ساعات سايىن اۋىستىرىپ تۇرعان دۇرىس. بالانىڭ كۇنى بويى ءبىر پامپەرسپەن جۇرۋىنە مۇلدە جول بەرمەگەن ءجون. سونداي-اق، بالانى پامپەرسكە ۇيرەتپەگەن ابزال. ەگەر بالا وياۋ بولسا، پامپەرس كيگىزبەي تەرىسىن دەمالدىرىڭىز. جاڭادان شىققان پامپەرستەردى دە ابايلاپ پايدالانىڭىز. ونى ۇزاق ۋاقىت كيگىزبەڭىز، ويتكەنى اللەرگيا تۋدىرۋى مۇمكىن.
سونداي-اق، كوپتەگەن جورگەكتەردىڭ ىشكى بەتىندە ارنايى الوە بالزامىنىڭ سىزىقشالارى بولادى. جورگەك بالا تەرىسىنە تيگەن كەزدە وعان بالزام ءسىڭىپ، جۇقا عانا سەنىمدى قورعانىس جاسايدى. بۇل تەرىنىڭ تىتىركەنۋىنە جول بەرمەيدى. بالزام نەگىزىنەن ۆازەلين مەن ستەاريل ءسپيرتى جانە باسقا دا قوسىمشا زاتتاردان تۇرادى. بۇل – بالا ءۇشىن مۇلدە زيانسىز. بۇنى بالا دارىگەرلەرى جۇرگىزگەن كوپتەگەن زەرتتەۋلەر دالەلدەپ بەرگەن. ولاردىڭ اللەرگيا تۋدىرۋ مۇمكىنشىلىگى وتە تومەن.
