قازاقستان رەسپۋبليكاسىندا تىلدەردى دامىتۋ مەن قولدانۋدىڭ 2011-2020 جىلدارعا ارنالعان مەملەكەتتىك باعدارلاماسىندا مەملەكەتتىك ءتىلدى ۇيرەتۋ ۇدەرىسىنە جاڭا اقپاراتتىق تەحنولوگيالاردى ەنگىزۋ قاجەتتىگى باسا كورسەتىلگەن بولاتىن. «ءتىل الەمى» پورتالىنىڭ «Atau.kz» ونوماستيكالىق، «Emle.kz» ورفوگرافيالىق، «Termincom.kz» تەرمينولوگيالىق سايتىنىڭ ىسكە قوسىلۋى ينتەرنەت كەڭىستىگىندەگى تىلدىك كونتەنتتىڭ كوبەيۋىنە، مەملەكەتتىك ءتىلدى قاشىقتان ۇيرەنۋشىلەر قاتارىنىڭ وسۋىنە مۇمكىندىك جاسايدى.

«ءتىل الەمى» پورتالى ءتىلدىڭ الەۋمەتتىك، قوعامدىق قۇبىلىس رەتىندەگى قىزمەتىن مەيلىنشە تولىق قامتيدى. پورتالدىڭ مازمۇنى قوعامداعى تىلدىك سۇرانىستارعا وراي 1)تۇعىر؛ 2)اقپارات؛ 3)ءادىس؛  4)ءتىل رايى؛  5)تارتۋ؛ 6)تولعانىس؛ 7) ورتا تاقىرىبىنداعى  7 بلوكقا توپتاستىرىلدى.

«تۇعىر» بلوگى «باسقى بەت» قىزمەتىن اتقارادى. مۇندا پورتالدىڭ قۇرىلىم اتاۋلارى، باسقا سايتتارعا سىلتەمەلەر ورنالاستىرىلعان. ءتىل جاڭالىقتارى، مينيسترلىك، كوميتەت تاراپىنان جۇرگىزىلىپ جاتقان جۇمىستار جونىندە حابارلار «اقپارات» بلوگىندا بەرىلسە، «ءادىس»  بلوگىندا قازاق، ورىس جانە اعىلشىن تىلدەرىن وقىتۋعا ارنالعان ادىستەمەلىك ەڭبەكتەر ورنالاستىرىلدى. بلوكتىڭ «عالىمنان كەڭەس»، «ادىسكەرگە كومەك» مودۋلدەرى ارقىلى  ءاربىر قولدانۋشى جالپى تىلگە جانە ءتىل ۇيرەنۋگە قاتىستى كاسىبي، عىلىمي، ادىستەمەلىك كومەك الادى.

 «تارتۋ» بلوگىنان كوميتەتتىڭ  تاپسىرىسى بويىنشا شىعارىلىپ جاتقان باسپا ونىمدەرىنىڭ جانە «ءتىل جانە قوعام»، «تۋعان ءتىل» الماناحتارىنىڭ، «بالاپان الەمى» جۋرنالىنىڭ، «ونوماستيكالىق حابارشى»، «تەرمينولوگيالىق حابارشى» بيۋللەتەندەرىنىڭ ەلەكتروندى نۇسقالارىن دا وقۋعا بولادى.

«ءتىل رايى» بلوگى مەملەكەتتىك تىلدە جارناما ماتىندەرىندەگى قاتەلەرگە، تەلە جانە راديو تىلشىلەرىنىڭ ءسوز قولدانىسىنداعى ولقىلىقتارعا نازار اۋدارىپ، ولاردى تۇزەتۋگە، تىلدىك نورمالاردى ساقتاۋعا باعىتتالعان.

ال «تولعانىس» بلوگىندا مەملەكەتتىك ءتىل تاقىرىبىنداعى  عىلىمي، عىلىمي-كوپشىلىك، پۋبليسيستيكالىق ماقالالار، پورتالدى قولدانۋشىلار تاراپىنان ۇسىنىلاتىن  وي-پىكىرلەر، ۇسىنىستار ورىن السا، «ورتا» بلوگىندا  پورتال تۋرالى اقپارات، بايلانىس، مەكەنجاي كارتاسى، نەگىزگى بلوكتاردا كورسەتىلگەن جوبالارعا تىكەلەي كىرۋگە مۇمكىندىك الۋ ءۇشىن تاقىرىپتىق انيماسيالىق قيىندىلار ورنالاستىرىلعان. 

«Termincom.kz» ەلەكتروندىق سايتى «بەكىتىلگەن تەرميندەر»، «تەرميندەر حرونولوگياسى»، «قولدانىستاعى سالالىق تەرميندەر»، «ويتالقى»، «قۇقىقتىق-نورماتيۆتىك بازا»،  «ءعىلىمي-ادىcتەمەلىك نەگىزدەر» جانە «ىزدەۋ» بلوكتارىنان تۇرادى. «بەكىتىلگەن تەرميندەر» بلوگىندا رەسپۋبليكالىق تەرمينولوگيالىق كوميسسياسىندا ماقۇلدانعان تەرميندەر  ورنالاستىرىلسا، «تەرميندەر حرونولوگياسىندا» تەرميندەردىڭ بەكىتىلۋ مەرزىمدەرى جانە ولاردىڭ سوزدىك رەتىندە جارىق كورۋىنەن مالىمەتتەر بەرىلەدى. «قولدانىستاعى سالالىق تەرميندەر» بلوگىندا رەسپۋبليكالىق تەرمينولوگيا كوميسسياسىنىڭ ماقۇلداۋىمەن جارىق كورگەن تەرمينولوگيالىق سوزدىكتەر سالىندى. «ويتالقى» ايدارىندا بەكىتۋگە ۇسىنىلاتىن تەرميندەرگە قاتىستى ءاربىر وقىرمان ءوز وي-پىكىرىن قالدىرا الادى. «عىلىمي-ادىستەمەلىك نەگىزدەر» بلوگىندا تەرمينجاسام  ماسەلەلەرىنە قاتىستى ەڭبەكتەر ۇسىنىلىپ وتىر.

«Atau.kz» ونوماستيكالىق ەلەكتروندىق سايتى «قۇقىقتىق-نورماتيۆتىك بازا»، «عىلىمي-تاجىريبەلىك نەگىزدەر» جانە «ىزدەۋ» بلوكتارىنان تۇرادى. «قۇقىقتىق-نورماتيۆتىك بازادا» سالاعا قاتىستى قۇقىقتىق نەگىزدەگى قۇجاتتار توپتاستىرىلعان. «عىلىمي-تاجىريبەلىك نەگىزدەرى» بلوگىندا ونوماستيكالىق اتاۋلاردىڭ تاريحى، ەتيمولوگياسى، جاسالۋ ەرەكشەلىكتەرى تۋرالى تانىمدىق سيپاتتاعى عىلىمي جانە عىلىمي-كوپشىلىك، انىقتامالىق ادەبيەتتەر مەن ماقالالار ۇسىنىلادى. «ىزدەۋ» بلوگى ارقىلى اتالعان قوردى پايدالانۋشى وزىنە قاجەتتى  ونوماستيكالىق اقپاراتتى تەرىپ، سۇرانىسىن قاناعاتتاندىرادى.

«Emle.kz» سايتى قازاقشا دۇرىس جازۋ، ءسوزدى دۇرىس ايتۋ، جۇرتشىلىقتىڭ ءتىل مادەنيەتىن كوتەرۋ ماقساتىندا قۇرىلدى. سايتتىڭ «ادەبي ءتىل نورمالارى» بلوگىندا ءسوز سازى، ونىڭ كوركەم ادەبيەت پەن ومىردەگى ماڭىزى، ەرەجەلەرى مەن قاعيدالارى بەرىلسە، «ورفوگرافيا» بلوگىندا سوزدەردىڭ دۇرىس  جازىلۋ ەرەجەلەرى بەرىلەدى. سونداي-اق كىرمە سوزدەر مەن تەرميندىك مانگە يە سوزدەردىڭ بۇرىنعى جانە قازىرگى جازىلۋ بارىسىنداعى ايىرماشىلىقتارى سالىستىرمالى تۇردە كورسەتىلەدى. «پۋنكتۋاسيا» بلوگىندا تىنىس بەلگىلەردىڭ قويىلۋ رەتىنە بايلانىستى ەرەجەلەر ەنگىزىلسە، «اببريەۆياتۋرا» بلوگىندا قىسقارعان سوزدەر، ولاردىڭ تولىق اتاۋلارى، قىسقارىلۋ رەتى، اتاۋلار مەن سوزدەردى قىسقارتۋ بارىسىندا باسشىلىققا الىناتىن قاعيدالار مەن سۇيەنەتىن زاڭدىلىقتار كەلتىرىلەدى. «ماقالالار» بلوگىندا عالىمداردىڭ وسى سالا نەگىزىندە جازىلعان عىلىمي ماقالالارى بەرىلەدى. ءاربىر ماقالادان كەيىن پىكىر قالدىراتىن ورىن بولادى. سول ارقىلى وقىرمان اۆتوردىڭ وزىنە، ماقالاسىنا قاتىستى سۇراقتار قويىپ، جاۋاپ الادى. وقىرمان ونلاين رەجيمىندە ورفوگرافياعا قاتىستى تۋىنداعان سۇراقتارىن قويا الادى. ءاربىر قويىلعان سۇراققا بىلىكتى مامانداردىڭ كومەگىمەن  تولىققاندى جاۋاپ  بەرىلەدى.

بۇل جوبالاردىڭ ىسكە قوسىلۋى مەملەكەتتىك ءتىلدىڭ قولدانىلۋ اياسىن كەڭەيتۋگە، ءتىل ۇيرەتۋدىڭ ءتيىمدى ادىستەرىن تاراتۋعا قولايلى جاعداي جاسايدى. پورتال مەن سايتتى تۇتىنۋشى ءتىل ءبىلىمىنىڭ كەز كەلگەن سالاسى بويىنشا تۋىنداعان سۇراقتارىنا جاۋاپ الۋ مۇمكىندىگىنە يە بولادى. ءتىل ماسەلەسىنە قاتىستى عىلىمي ەڭبەكتەر مەن ماقالالاردىڭ، سيرەك كەزدەسەتىن كوركەم جانە ادىستەمەلىك ادەبيەتتەردىڭ قول جەتىمدىلىگى، كەي تارتىستى ساۋالدارعا ماماندار تاراپىنان بەرىلگەن تولىققاندى جاۋاپ ازاماتتاردىڭ  ءتىل مادەنيەتىن كوتەرىپ، تىلدىك ساۋاتتىلىعىن ارتتىرارى ءسوزسىز.