اقتوبەدە ۇرلانعان مۇنايدى قىلمىستىق توپ رەسەيگە دە تاسىمالداپ وتىرعان. ولار قارا التىندى كورشى ەلگە جەتكىزۋ ءۇشىن جالعان قۇجاتتار پايدالانىپتى. بۇل تۋرالى كتك حابارلايدى دەپ جازدى Stan.kz

سونداي-اق، مۇناي قورىن ساقتاۋعا جانارماي بەكەتىن جالعا الىپ، ەكى كومپانيانى مەملەكەتتىك تىركەۋدەن وتكىزگەن. ال مۇنىڭ بارلىعىن قۇزىرلى ورگاندارداعى ادامدارى ىسكە اسىرعان كورىنەدى.

مۇناي ۇرلىعىنا قاتىستى قىلمىستىق توپ مۇشەلەرىنىڭ ءار قيىمىلىن ەركىن ءىزباسار باقىلاۋدا ۇستاپ وتىرعان. سوتتا وقىلعان ايىپتاۋدا «اعايىندى تورتەۋ» سەركەسىنىڭ ايتقانىن مۇحامەديانوۆ، سارسەنوۆ جانە قايىربايەۆ بۇلجىتپاي ورىنداپ وتىرعانى كورسەتىلگەن.

سوڭعى ەكەۋى ۇرلانعان مۇنايدى وتكىزەتىن جەر ىزدەپ، ونى تاسىمالداۋدى ءوز مويىندارىنا الىپتى. وتىز جاستاعى نۇربولات قايىربايەۆ جۇك كولىگىن ايداي الاتىن ءتورت اۋىلداسىن ۇيىمعا تارتادى. ال ەركىن ءىزباسار باستاعان توپتىڭ جەتەكشىلەرى بارلىق سۇراقتاردى جەكە كەزدەسىپ شەشىپ وتىرعان. بۇل قيتۇرقى ارەكەتتىڭ شەتى بيىل ساۋىردە بەلگىلى بولىپتى. ۇرلانعان 97 مىڭ ليتر مۇنايدى رەسەيگە اپارا جاتقان جۇك كولىگى ۇستالىپ، ۇيىمعا قاتىستىلاردى انىقتاۋعا سول سەپتىگىن تيگىزگەن كورىنەدى.

بۇل ءىس بويىنشا كۇدىكتىلەردى ۇستاۋ ءالى جالعاسىپ جاتىر. ازىرگە ولاردىڭ ون ەكىسى عانا قاماۋعا الىنعان.

"ءىزباسار قۇرعان توپ ۇيىمداسقان تۇردە، ءبىر كىسىدەي جۇمىس ىستەگەن. ۇزاق ۋاقىت بويى قىلمىستارىن جۇزەگە اسىردى. ەركىن ءىزباسار مۇشەلەرىنە اتقاراتىن ىستەرىن ءبولىپ بەرىپ، ءبارىن الدىن الا جوسپارلاپتى. قىلمىستىق توپ مۇشەلەرى بىر-بىرىمەن تىعىز بايلانىستا بولىپ، تەلەفون ارقىلى بەلگى بەرىپ، كەزدەسەتىن جەرلەرىن ايتىپ وتىرعان”، – دەيدى اقتوبە قالالىق سوتىنىڭ سۋدياسى زينايدا شميروۆا.

بۇعان دەيىن ەركىن ءىزباساردىڭ اناسى ۇلىنىڭ مۇناي ۇرلاماق تۇگىلى، بيلەتكە اقشا تاپپاي قينالىپ ءومىر سۇرگەنىن ايتقان ەدى. بۇدان بۇرىن اقتوبەدە ارنايى وپەراسيا جۇرگىزىلىپ جاتقانىن حابارلاعان ەدىك. كەيىنىرەك جاعدايعا قاتىستى ۇقك تۇسىنىكتەمە دە بەرگەن. اقتوبەدەگى مۇناي ۇرلىعىن سالافيتتەرگە قاتىسى بار قىلمىس الەمىنىڭ اتىشۋلى سەركەسى باسقارعانى حابارلاندى.