ادەتتە جۇڭگو ءبىر ۇلكەن جوبانى جوسپارلاپ، قابىرعاسىن قالاماستان ەكى جىل بۇرىن جارناماسىن جاسايدى.

جۇڭگو حالقى ءبىر جەردى تولىقتاي ساتىپ الماسا نەمەسە 40-50 جىل جالعا الماسا اتىن دابىرايتىپ ايتپايدى. «قامشى» پورتالى پوشتاسىنا قىتايلاردىڭ قيتۇرقى جارناماسى تۋرالى ماتەريال كەلىپ ءتۇستى.

جارناماداعى جازۋدىڭ قازاقشا اۋدارماسىندا قىتايلار الماتىداعى «جۇڭگو ساۋدا ورتالىعىنا» ءوز حالقىنان ينۆەستورلار شاقىرادى.  جۇڭگو ازاماتتارىن قازاقستانعا شاقىرعان جارناما مازمۇنى بويىنشا،  كەلەتىن ادامعا قويىلاتىن تالاپ  20 مىڭ دوللار قارجى قوسسا بولعانى 30 شارشى مەترلىك ساۋدا ۇيىنە يە بولا الادى. ءتىپتى جارنامادا بازارداعى سالىقتىڭ جوقتىڭ قاسى ەكەنى ايتىلعان. سونداي-اق كەڭ الاڭدى اۆتوپارك، قاتىناستىڭ قولايلىلىعى، ءقوناقۇي مەن دۇكەندەردىڭ جاقىندىعى ايتىلعان جارنامادا قازاقستانعا كەلشى قىتايلارعا ۆيزانىڭ دا قيىندىقسىز اشىلاتىنى جازىلعان. كىسى سانىنا شەكتەۋدىڭ جوق ەكەنىن ايتىپ، بوس جاتقان جەردىڭ كوپ ەكەنىن ايرىقشا ەسكەرتكەن.

ايتا كەتەتىن بولساق، قازاقستاندا جۇمىس ىستەيتىن جۇڭگو ازاماتتارىنىڭ كوبەيىپ جاتقاندىعى تۋرالى قوعامدا الاڭداۋشىلىق بار. بۇل تۋرالى قازاق ءتىلدى باسپا ءسوز ءجيى-جيى جازىپ كەلەدى. سونداي-اق قازاقستاندا شەتەلدىك ازاماتتارمەن سالىستىرعاندا ءوز ازاماتتارىمىزدىڭ بىردەي جۇمىستا تومەن جالاقى الاتىنى تۋرالى دا ەڭبەك داۋى ءجيى تۋىنداپ كەلەدى.