شاعىن قۇرامدا وتكەن كەزدەسۋ بارىسىندا قازاقستان مەن يزرايل سەرىكتەستىگىنىڭ باستى باعىتتارى تالقىلاندى جانە ساۋدا-ەكونوميكا، ينۆەستيسيا، سونداي-اق يننوۆاسيالىق تەحنولوگيالار سالالارىنداعى ىنتىماقتاستىقتىڭ نەگىزگى ماسەلەلەرى قاراستىرىلدى. بۇل تۋرالى اقوردانىڭ باسپا ءسوز قىزمەتى حابارلادى.
تاراپتار كۇن تارتىبىندەگى مەيلىنشە وزەكتى حالىقارالىق جايتتار جونىندە دە پىكىر الماستى.
مەملەكەت باسشىسى نۇرسۇلتان نازاربايەۆ ب.نەتانياحۋدىڭ ساپارى بارشا قازاقستاندىقتار ءۇشىن ايتۋلى مەرەكە – تاۋەلسىزدىكتىڭ 25 جىلدىعى قارساڭىندا ءوتىپ وتىرعانىن ايتتى.
– وسى جىلداردا قازاقستان مەن يزرايل اراسىندا جىلى قارىم-قاتىناس ساقتالىپ كەلەدى. قازاقستاندا تۇرىپ جاتقان كوپتەگەن ەۆرەي دياسپوراسى وكىلدەرى مەن يزرايلدەگى قازاقستاندىق قاۋىمداستىق حالىقتارىمىز اراسىنداعى سىندارلى قارىم-قاتىناستىڭ دانەكەرى بولىپ وتىر، – دەدى قازاقستان پرەزيدەنتى.
مەملەكەت باسشىسى قازاقستاننىڭ يزرايلمەن ىسكەرلىك بايلانىستاردى ودان ءارى دامىتۋعا مۇددەلى ەكەنىن ايتا كەلە، بۇل ساپار ەكىجاقتى قارىم-قاتىناس اياسىن كەڭەيتۋگە تىڭ سەرپىن بەرەدى دەپ ۇمىتتەنەتىنىن ءبىلدىردى.
يزرايل مەملەكەتىنىڭ پرەمەر-مينيسترى قازاقستانعا تاۋەلسىزدىك مەرەيتويى قارساڭىندا كەلگەنى ءوزى ءۇشىن زور مارتەبە ەكەنىن جەتكىزدى.
– قازىرگى كەزدە الەم ۇلكەن وزگەرىستەردى باستان وتكەرۋدە، قاۋىپسىزدىك سالاسىندا كوپتەگەن سىن-قاتەرلەر پايدا بولدى. سونىمەن بىرگە بۇل وزگەرىستەر نەگىزىنەن ەكونوميكانىڭ كەز كەلگەن سالاسىمەن تىعىز بايلانىستى جاڭا تەحنولوگيالاردىڭ زور مۇمكىندىكتەرىنە جول اشۋدا، – دەدى ب.نەتانياحۋ.
پرەمەر-مينيستر ءيزرايلدىڭ قاۋىپسىزدىك پەن جاڭا تەحنولوگيالار سالاسىندا زور تابىستارعا جەتكەنىنە نازار اۋداردى.
– وسىعان وراي قازاقستان دامۋىنىڭ ستراتەگيالىق جوسپارلارى مەن ءيزرايلدىڭ مۇمكىندىكتەرىن ەكى ەلدىڭ يگىلىگى جولىندا ۇشتاستىرۋدى ۇسىنامىن، – دەدى ب.نەتانياحۋ.
مەملەكەت باسشىسى يزرايل پرەمەر-مينيسترىنىڭ ۇسىنىسى قازاقستان تاراپىنىڭ جوسپارلارىمەن ۇيلەسەتىنىن اتاپ ءوتتى.
– ءيزرايلدىڭ يننوۆاسيا مەن جاڭا تەحنولوگيالار سالاسىنداعى جەتىستىكتەرى بىزگە جاقسى تانىس. بۇگىندە 270 كومپانيا ەكونوميكانىڭ ءتۇرلى سالالارىندا قازاقستان كاسىپورىندارىمەن ىنتىماقتاسا جۇمىس جۇرگىزۋدە. ءسىز ۇسىنعان فورمات بويىنشا ىنتىماقتاستىق ورناتۋ تۋرالى ماسەلە بۇگىنگى بيزنەس-فورۋم اياسىندا قىزۋ تالقىلانادى دەپ ويلايمىن، – دەدى نۇرسۇلتان نازاربايەۆ.
