بۇگىن باس پروكۋراتۋرا فرانسيا مەملەكەتتىك كەڭەسىنىڭ ىزدەۋدە جۇرگەن قازاقستاندىق بانكير مۇحتار ءابلازوۆتى بوساتۋ تۋرالى شەشىمىنە قاتىستى ۇستانىمىن جاريالادى، - دەپ حابارلايدى Qamshy.kz.

«ءقىلمىستىق-ىس جۇرگىزۋ زاڭنامالارىنىڭ تالاپتارىنا سايكەس، ايىپتالۋشى تۇلعانى قىلمىستىق قۋدالاۋ ونى سوتقا تاپسىرعانعا دەيىن جالعاسادى. سوندىقتان، قازاقستاننىڭ باس پروكۋراتۋراسى ايىپتالعان كەز-كەلگەن تۇلعانى ۇستاۋ، تەرگەۋدى اياقتاۋ، سوت تەرگەۋى مەن كەلتىرىلگەن شىعىندى قالپىنا كەلتىرۋ ءۇشىن زاڭدا كورسەتىلگەن بارلىق شارالاردى قولدانادى»، - دەلىنگەن باس پروكۋراتۋرا تاراتقان حابارلامادا.

سونداي-اق، قاداعالاۋشى ورگان مۇحتار ءابلازوۆتى قازاقستان مەن رەسەيدەن باسقا بىرنەشە ەۋروپا مەملەكەتتەرى دە ءتۇرلى قىلمىستارى ءۇشىن ايىپتاپ وتىرعانىن حابارلادى. ول مەملەكەتتەردىڭ ىشىندە ۋكراينا، شۆەيساريا دا بار. ال، ۇلىبريتانيادا ول 22 ايعا باس بوستاندىعىنان ايرىلعان.

ەستەرىڭىزگە سالساق، اعىمداعى جىلدىڭ 9 جەلتوقسانىندا فرانسيانىڭ مەملەكەتتىك كەڭەسى ءابلازوۆتى رف-عا ەكستراديسيالاۋ تۋرالى شەشىمنىڭ كۇشىن جويىپ، ونى قاماۋدان بوساتقان بولاتىن.

ءابلازوۆتى قازاقستاننىڭ قۇقىققورعاۋ ورگاندارى قارجى جىمقىردى، زاڭسىز جولمەن تابىلعان كىرىستى زاڭداستىردى، بانك قاراجاتىن زاڭسىز پايدالاندى، لاۋازىمدىق مىندەتتەرىن اسىرا پايدالاندى، ۇيىمداسقان قىلمىستىق توپ قۇرىپ، باسقاردى دەپ ايىپتاۋدا.

«ءابلازوۆ پەن ونىڭ سەرىكتەستەرى 7،5 ميلليارد دوللاردان استام قارجى جىمقىرعان. ونى ايىپتاۋ جونىندەگى قىلمىستىق ءىس 160-تان استام ەپيزودتان قۇرالادى جانە ءبىزدىڭ تەرگەۋ تاجىريبەمىزدەگى كۇردەلى ەكونوميكالىق ىستەردىڭ ءبىرى بولىپ سانالادى. بۇل ءىستىڭ ءاربىر ەپيزودى بىرنەشە ءجۇز ميلليارد تەڭگە قارجى جىمقىرۋ تۋرالى مالىمەتتەردەن قۇرالادى»، - دەلىنگەن حابارلامادا.