بەلگىلى تەلەجۋرناليست اسحات سادىرباي الەۋمەتتىك پاراقشاسىندا ەلدى شۋلاتقان Ninety one توبىنا قاتىستى ويىن ءبىلدىرىپ، ولاردىڭ جاقىندا جارىق كورگەن بەينەبايانىنا باعا بەردى. بىرنەشە كۇن بۇرىن Ninety one توبىنىڭ «قالاي قارايسىڭ» دەگەن انىنە تۇسىرگەن بەينەبايانى جارىق كورگەن بولاتىن. بۇل جولى دا قالىڭ وقىرمان قاتتى سىنعا الدى. وسى ورايدا ءۇنسىز قالۋدى ءجون كورمەگەن تەلەۋرناليستىڭ جازباسىن الىپ-قوسپاسىز نازارلارىڭىزعا ۇسىنامىز، دەپ حابارلايدى reactor.inform.kz

"Ninety one تۋرالى ەكىنشى رەت جازىپ وتىرمىن. باسقا جازاتىن نارسە جوق پا، سونى دا اڭگىمە قىلىپ، ونسىز دا پروبلەما جەتەدى، سوندا ءسىز سوندايلاردى قولداپ، ناسيxاتتاپ وتىرسىز با جانە ت.ب. وسى سارىنداعى اڭگىمەلەر مەن نەگىزسىز ايىپتاۋلار قابىلدانبايدى، بىردەن ايتىپ قويايىن.

مەن مۋزىكا نەمەسە ونەر سىنشىسى ەمەسپىن. سىنشىلار الداعى ۋاقىتتا ءوز ويلارىن ايتا جاتار. ولاردىڭ ايتارى مەنىڭ پىكىرىممەن سايكەس كەلمەۋى دە مۇمكىن. مەن «91» توبىنا تاعى ءبىر رەت شولۋ جاساپ كورمەكپىن.

مەنىڭشە NinetyOne  تاۋەلسىز قازاقستاننىڭ ەسترادا، مۋزىكا تاريxىنا كىرەدى. مەن ولاردى جاي عانا توپ ەمەس، ءبىزدىڭ مۋزىكاداعى ءبىر قۇبىلىس دەر ەدىم (ارتىق كەتۋىم دە، جاڭىلىسۋىم دا مۇمكىن، ءبىراق سوندا دا). بولاشاقتا ولار تۋرالى وقىتۋشىلار ستۋدەنتتەرگە ساباق ايتىپ، دارىستەردە تالقىلايتىن بولسا تاڭقالمايمىن.

بايقاساڭىزدار ءقازىر ولاردى جاستار دا، ۇلكەندەر دە بىلەدى. شۇيىركەلەسە قالسا مىندەتتى تۇردە تالقىلايدى. قانشا اي وتسە دە ءالى وزەكتى، قىزىق، ەرەكشە. توپ رەزونانس تۋدىردى. شىققاندارىنا 1-اق جىل بولسا دا كوپ رەتتە كاسىبي ەمەس سىنعا، دورەكىلىك پەن مادەنيەتسىز ايىپتاۋلارعا ىلىگە بەردى.

قايتەمىز، ءبىزدىڭ ەسترادا ورىنداۋشىلارى تىڭدارماندى ءبىر سارىندى ستيلدەگى كوشە، اۋەسقوي، توي اندەرىنە ابدەن ۇيرەتىپ تاستادى. جاڭا، ساپالى، زاماناۋي تىڭ دۇنيەلەر شىعا قويمادى. وتاندىق مۋزىكا يندۋسترياسىندا نەشە جىلدان بەرى مۇنداي ريەۆوليۋسيا بولماپ ەدى. كوپشىلىكتىڭ ۇركە، شوشي قاراۋى دا سول سەبەپتى. ولار جايلى ايتىلاتىن سىندارعا قاراپ وتىرسام (شامامەن) 98.9%-ى ەموسيالار مەن قۇر ايقاي.
 
مەن دە ۇلتىمدى سۇيەمىن، مەن دە ۇلت بولاشاعىنا الاڭدايمىن. ءبىراق سۋبەكتيۆتى پىكىر مەن نەگىزسىز، دايەكسىز سىنعا، نەگاتيۆكە قارسىمىن. ءقازىر ءبىز كيىز ۇيدە تۇرمايمىز، اتپەن جۇرمەيمىز. ءححى عاسىردا ءبارىمىز زامان تالابىنا ساي ءومىر سۇرۋدەمىز. دەمەك كەز-كەلگەن ماسەلەنى وركەنيەتتى ەلدىڭ ازاماتى رەتىندە مادەنيەتتى سويلەسىپ شەشۋگە بولاتىنىن ۇمىتپايىق.

ەربولاتتى تانيمىن، ءبىراق كورمەگەلى، سويلەسپەگەلى قاي زامان؟! سوڭعى رەت قاشان كورگەنىم دە ەسىمدە جوق. توپتاعى جىگىتتەردىڭ بىرەۋىن دە تانىمايمىن، اتتارىن دا بىلمەيمىن. ەشكىمنىڭ ادۆوكاتى نەمەسە پيارشىسى ەمەسپىن. پوستقا ەشكىم ەشنارسە تولەگەن جوق.
شىن جۇرەكتەن، «91» توبىنىڭ بۇگىن «قالاي قارايسىڭ» دەپ اتالاتىن بەينەبايانىن تامشالادىم. جىگىتتەر تاعى دا مەنى مويىنداتتى. مۋزىكا، ارانجيروۆكا، ساپا، xارەوگرافيا وتە جاقسى".