«رەال مادريد» مەكسيكالىق «امەريكانى» فينالعا وتكىزبەدى

/uploads/thumbnail/20170709185649213_small.jpg

كلۋبتار اراسىندا الەم چەمپيوناتىنىڭ جارتىلاي فينالدىق كەزدەسۋىندە «رەال مادريد» مەكسيكالىق «امەريكا» كلۋبىمەن كەزدەستى. ويىن 15-جەلتوقسان كۇنى ياپونيادا «نيسسان» ستاديونىندا ءوتتى. 

ويىننىڭ باستاپقى مينۋتتارى كورولدىك كلۋبتىڭ باسىمدىلىعىمەن ءوتتى. 2016 جىلى التىن دوپتى الىپ، ۇزدىك فۋتبولشى اتانعان كريشتيانۋ رونالدۋ،تولىقتاي كورولدىك كلۋبتى العا سۇيرەدى. 21-مينۋتتا مەكسيكالىق كلۋب ويىنداعى العاشقى سوققىسىن جاسادى. 30-جاسقا تولىپ وتىرعان كەيلور ناۆاس تۋعان كۇنىندە قاقپاسىن قۇرعاق ساقتاعىسى كەلىپ، دوپقا تويتارىس بەردى. 22-مينۋتتا مەكسيكالىق كلۋبتىڭ جارتىلاي قورعاۋشىسى سامبۋەسا، رونالدۋعا قارسى ءتارتىپ بۇزعانى ءۇشىن پاراگۆايلىق تورەشى ەنريكە كسەرەستەن ەسكەرتۋ قاعازىن الدى. كورولدىك كلۋب 26-مينۋتتا گول سوعۋعا  جاقىن قالدى. لۋكاس ۆاسكەس وڭ قاپتالدان ايىپ الاڭىنا دوپتى اۋەلەتە رونالدۋعا جەتكىزدى. رونالدۋ باسپەن سوققى جاساعاندا، دوپ قاقپانىڭ باعاناسىنا ءتيىپ، قاقپا تورىنان تابىلمادى. ءبىرىنشى تايمنىڭ سوڭعى مينۋتتارىندا شابۋىلعا كوپ ءمان بەرگەن مەكسيكالىق كلۋب قورعانىستا وسالدىق تانىتتى. باس تورەشى قوسقان قوسىمشا ءۇش مينۋتتا كورولدىك كلۋب ەسەپتە العا شىعىپ ۇلگەردى. ايىپ الاڭ الدىندا كرووس قاقپاعا جاقىن قالعان بەنزەماعا پاس شىعاردى، بەنزەما مۋنوستى قاپى قالدىرىپ ءمۇلت كەتپەدى.

ەكىنشى تايمدا «امەريكا» فۋتبولشىلارى گول سوعۋعا قانشا تىرىسسا دا، كورولدىك كلۋب ەش مۇمكىندىك بەرمەدى. ويىن تىزگىنى «رەالدىڭ» قولىندا ەكەنىن بايقاعان «امەريكانىڭ» باس باپكەرى  70-مينۋتتا رومەرونىڭ ورنىنا اررويونى كىرگىزىپ، شابۋىلدى كۇشەيتۋگە تىرىستى. ەكى مينۋتتان سوڭ «رەالدىڭ» باس باپكەرى زيدان دا قوسالقى قۇراممەن ويىنعا جاڭا كۇش قوستى. كرووستىڭ ورنىنا حامەس رودريگەستى الاڭعا كىرگىزدى. 80-مينۋتتا زيدان الاڭعا ويىنداعى العاشقى گولدىڭ اۆتورى بەنزەمانى موراتامەن الماستىرىپ شابۋىلعا سەرپىن قوستى. سوڭعى مينۋتتارعا دەيىن رونالدۋ گول سالۋعا تىرىستى. ەكىنشى تايمنىڭ قوسىمشا ۋاقىتىندا وفسايدتان قاشىپ ۇلگەرگەن رونالدۋ قاقپاشىمەن بىرگە ءبىر شىعىپ، مۋنوستى قاپى قالدىرتىپ، ويىن نۇكتەسىن قويدى.

18-جەلتوقساندا «امەريكا» كولۋمبيالىق «اتلەتيكومەن» ءۇشىنشى ورىنعا كەزدەسۋ وتكىزسە، كلۋبتار اراسىندا الەم چەمپيونى اتانۋ ءۇشىن «رەال مادريد» جاپونيانىڭ «كاسيما انتلەرس» كلۋبىمەن ب ا ق سىنايتىن بولادى.

اۆتورى: تولەپبەرگەن ماليكوۆ  

قاتىستى ماقالالار