اۆستريالىق پارلامەنت، 1889 جىلى ادولف گيتلەر تۋىلعان ءۇيدى مەملەكەت پايداسىنا جاراتۋعا ارنايى زاڭ قابىلدادى دەپ حابارلايدى bbc.com. عيمارات نەوۇلتشىلداردىڭ ورتالىعىنا اينالماۋى ءۇشىن وسىنداي زاڭ قابىلدانعان.

براۋناۋ-ام-ينن قالاسىندا  ورنالاسقان 3 قاباتتى ءۇيدىڭ قازىرگى يەسى  گەرليندا پوممەر ونى ساتۋعا ۇزىلدى-كەسىلدى قارسى شىقتى.

عيمارات تۋريستەردىڭ ەڭ كوپ كەلەتىن ورنىنا اينالماۋى ءۇشىن 1972 جىلى مۋنيسيپالدىق بيلىك  ونى  جوعارى باعاعا جالعا العان. ءقازىر وعان اي سايى 4800 ەۋرو تولەنەدى.

ءۇي گەرليندا پوممەردەن كۇشتەپ الىنعاننان كەيىن وعان وتەماقى تولەنەدى. الايدا، قانشا بەرىلەتىنى ازىرشە بەلگىسىز.

گيتلەر ءۇيدىڭ جوعارعى قاباتىندا جالعا بەرىلگەن پاتەردە دۇنيەگە كەلگەن. اۆستريادا ءۇيدىڭ تاعدىرىن قالاي شەشۋ جونىندە بۇعان دەيىن دە تالقىلاعان. ءىىم ۆولۆگانگ سوبوتكا ونى قۇلاتۋدى ۇسىنىپ كەلەدى. الايدا، تاريحشىلار وعان قارسى شىقتى. ولاردىڭ ويىنشا عيماراتتى بۇزۋ، ەلدىڭ ناسيستىك وتكەنىن جوققا شىعارۋمەن پارا-پار.

قازىرگى تاڭدا تاريحي عيماراتتىڭ كىرەبەرىسىندە «بەيبىتشىلىك، ەركىندىك جانە دەموكراتيا ءۇشىن. فاشيمزگە ورىن جوق» دەپ جازىلعان تاقتايشا ءىلىنىپ تۇر. گيتلەردىڭ اتى اتالماعان.

ادولف گيتلەردىڭ اتا-اناسى زالسبۋرگەر-فورشتادت كوشەسىندەگى ۇيدە بىرنەشە اپتا عانا تۇرعان. گيتلەر تۋىلعاننان كەيىن باسقا اۋدانعا كوشىپ كەتكەن. ونىڭ جاسى ۇشكە تولعاندا براۋناۋ-ام-يننا قالاسىنان مۇلدە كوشىپ كەتكەن.